Wever: Corupcion den maneho pa stranhero ta stroba Rubiano cu trabou

ORANJESTAD - Poco poco, pero sigur, pa e yiu di tera ya lo no tin lugar mas riba nos mercado laboral. Esaki ta pensamento di ex minister encarga cu permiso, Booshi Wever. E ta referi na e articulo cu recientemente a sali den NoticiaCla. E articulo a relata cu Corte a duna un sentencia, unda e ta bisa cu e ciudadano mericano mester wordo trata mescos cu un "Rijksgenoot". “Masha poco atencion a ser poni al respecto. Esaki ta di lamenta, pasobra nos a adverti pa esaki for di hopi tempo caba” Wever a sigui bisa.

TEMPO DI MINISTER

“Tempo cu mi tabata responsabel pa e cartera di "Vreemdelingenzaken", mi mester a discuti fuertemente cu Hulanda y Antiyas, pa motibo cu nan tabata insisti pa Aruba tambe acepta e asina yama "Vrije Verkeer van Personen", y ni cuanto presion cu a ser poni, mi a sa di resisti nan tur, pasobra mi maneho tabata dirigi riba proteccion di nos yiunan di tera” Wever a sigui bisa. Segun e ex mandatario y actual lider di su propio partido UPP cada vez e tabata mustra riba e "vriendschapsverdrag" cu Hulanda tin cu Merca, cu ta vigente pa Aruba tambe. “Hopi a critica mi, wel ata prueba di e proverbio den Hulandes: "een gewaarschuwd man telt voor twee"!! Manera tin un dicho famoso di awendia ta bisa: " Mi a taha bo"!! “ Wever a sigui bisa.

CAMBIO DI GOBIERNO

Segun Wever, despues di cambio di gobierno na 2009, su maneho estricto na DIMAS, ‘y mas importante sin corupcion, na defensa di e clase trahador local, a cambia pa un maneho "free for all", yena cu corupcion atrobe’, e ta bisa. Consecuencia di e maneho aki ta cu nos propio yiunan di tera no ta bin na remarca pa haya un trabou na ningun nivel. “ Mi mester hari ora cu mi tende ministernan bisa cu no ta duna "Eerste vergunning" mas. Esaki ta un mentira, y mi ta spera cu e titular responsabel pa esaki, hiba mi corte tambe, pa mi por cuminza na mustre un prueba. Y no ta di un "inwonende dienstbode". “ E informacion cu Wever tin ta bisa cu tin hopi permiso di "inwonende dienstbode" masculino, cu a y cu ta drentando mercado laboral, te hasta ta wordo bisa riba recomendacion di cierto ministernan. Si nan no ta subiendo nos mercado laboral, anto na Aruba nos mester tin hopi "butlers" trahando na cas di hende. Banda di esaki, masha hopi hende ta haya un "toeristisch verblijf" pa 6 luna sin ningun tipo di garantia. “ Ta mas cu obvio cu esnan cu e tipo di permiso aki, no ta keda Aruba pa ta turista, pero ta pa drenta e mercado laboral, y loke nan ta ser paga ta un salario hopi biaha bow sueldo minimo. E consecuencia directo ta cu alrededor di 60% di nos hendenan no ta contribui cu ni un cen preto na belasting” Wever a subraya.

YIUNAN DI TERA

Segun Wever, aki ta nos yiunan di tera ta esunnan cu ta sufri, paso e yiu di tera no ta dispuesto ni pa traha pa un salario miserable, ni ta dispuesto pa keda sin paga belasting. Pues nos yiunan di tera a para bira ciudadanonan di segunda categoria den e nivel di trabou abou te mediano.Lesa su comunicado completo aki.