KPA: Polis no ta saca Parada di Luz ni pusha esaki manera custumber

MACUARIMA – Contrario na e forma normal di proceder, e biaha aki polis no ta saca un parada ni pusha un parada manera ta custumber. Normalmente polis ta saca un parada, cu guia y control aden y na final ta cera e parada (pusha). Den un comunicado diabierna mainta, cuerpo policial a clarifica nan tarea den e parada di luz nacional. Den e comunicado, nan ta splica e.o. e parti ariba di saca y pusha parade. De hecho, ta bisa hopi cla tambe cu ‘Cuerpo Policial Aruba su unico tarea principal ta keda pa mantene orden publico’.

CERA CAMINDA

A splica cu polis ta cera e ruta caminda e parada lo pasa for di 6’or di atardi y lo keda cera t’e cu 3o’r di marduga. E ruta di e parada aki cuminsa na altura di Aruba Entertainment Center ariba Caya Milio Croes direccion Vondellaan y via L.G. Smith Blvd t’e cu Turbo Retonde na altura di Wendy’s. Na altura di ex-DOW na Paardenbaaistraat lo para e musica di e banda y e grupo mes lo sigui cana bay abou t’e cu Turbo Retonde.

HABRI Y CERA

“Polis no lo pusha e parada y tampoco lo saca e parada. Esakinan ta keda responsablidad di esun cu tin e permiso (Vergunninghouder)” e articulo ta sigui bisa.E vergunninghouder, esta esun cu tin e permiso, den e caso aki no ta SMAC tampoco sino ministerio di cultura. 

KEN TA VIGILA E PARADA

Tambe polis ta clarifica cu e (Vergunninghouder) tin e obligacion pa percura pa e seguridad di cada participante. A haci un palabracion cu mester tin cuater (4) personal di seguridad pa cada shen (100) participante. Esey kier men cu si tin p.e. 850 participante pa grupo, mester tin por lo menos 34 persona cu ta encarga cu e seguridad. 

DOCUMENTO NA ORDO

(Vergunninghouder) mester percura tambe pa vehiculo di motor den e parada mester tin tur documentonan na ordo manera: Belasting paga pa 2022, Seguro valido, keuringskaart, chauffeur cu rijbewijs y pa percura cu e chauffeur no ta bou influencia di alcohol of otro substancia.

POLIS RIBA CAYA

Cuerpo Policial Aruba a clarifica tambe cu mientras cu nan lo no ta encarga cu e control y seguridad di e parada mes, nan lo tey pa seguridad di tur otro pafo di e parada y Aruba completo y cu  lo tin den total di 150 personal consistiendo di polis y Stakeholdersnan cu ta pa cubri henter Aruba y no e parada. 

TRANKILIDAD

“Nos comunidad por ta trankil cu nos tin suficiente polis pa cada districto y pa e parada. E operacional diario di Cuerpo Policia lo continua. Nos patruyanan lo keda atento y activo pa mantene orden publico di nos pais” e comunicado ta sigui bisa. A manda un mensahe final pa comunidad pa ban trankil, gosa e parada aki sanamente y comporta bo mes. “Nos lo tey hunto cu bo pa percura pa e seguridad di cada cuidadano. Celebre responsabelmente!”