Contracto cu Aruba no ta permiti Schiphol Group tambe maneha aeropuerto di Corsou

ORANJESTAD – Aunke ta trata di pais bisiña ruman, Aruba no por permiti pa Schiphol Group tambe cera un acuerdo pa maneha e aeropuerto di Corsou. Segun e mandatario responsabel pa aeropuerto, Dangui Oduber, Schiphol Group a mustra interes pa tambe maneha aeropuerto di Corsou. Pa hopi aña caba Aruba su aeropuerto ta wordo maneha pa Schiphol Group, cu ta ensera cu nan ta apunta un persona como e CEO di e aeropuerto. Y awor a compronde pues cu e compania Hulandes kier haci mescos cu Corsou. Pero e mandatario ta recorda cu ta para den contract entre Schiphol Group y AAA, cu Schiphol Group no por cera ningun acuerdo cu un aeropuerto cu ta competencia pa Aruba. Mientras cu Corsou ta ruman di nos, ‘na final di dia e ta keda un competencia pa pais Aruba, mescos cu tur e otro paisnan den region. “Den e caso aki, nos por considera cu e airport di Corsou ta un competidor di pais Aruba!” e mandatario a sigui bisa. 

UN PERSONA LOCAL COMO CEO 

Ademas, segun Oduber, Schiphol Group no ta cumpliendo cu e acuerdo unda cu mester a prepara un yiu di tera (Arubiano:red), pero cu esey nunca a tuma lugar. “Pesey nos tin cu bay renegocia e contracto y den e proceso di renegosacion, e punto di salida di nos ta , cu nos mester tin e derecho conforme e palabracion haci, pa apunta nos propio CEO cu mester bira un persona local.