Wever: Parada Nacional ta instrumento pa mustra cu Aruba ta cla pa ricibi turista

ORANJESTAD – E parade Nacional di Luz di diasabra awor, mester ta un instrument di mercadeo pa mustra cu Aruba ta cla pa ricibi turista. Asina minister presidente Evelyn Wever a bisa noticiacla diahuebs. Esaki ta e motibo pa tene e parada awor. Mes momento e la sigura cu e fondonan no ta bay di presupuesto di gobierno di Aruba sino di e companianan semi gubernamental. E mandatario tabata corto pero conciso cu su contestanan na e portal aki. Tabatin mas pregunta, pero e mandatario a opta pa pasa esey pa coleganan Oduber y Maduro, cu ta responsabel pa e parade. 

CUIDA

Loke si e mandatario a pidi, ta cu mirando cu lo tin aglomeracion di hende y cu nos ta saliendo di e efectonan di pandemia, ta pa tur hende cuida nan mes y nan famia. “ Gobierno a elimina e medidanan y lo no ta cuidando bo di e virus. Nos no por a mantene e medidanan tampoco debi na e cantidad di caso abou. Awor bo mes mester cuida bo mes y bo famia” e mandatario a finalisa bisando. 

E PARADA

Tabata dos siman pasa awe diabierna cu gobierno a anuncia di forma di sorpresa, cu Aruba lo tin un parade di luz nacional cu ta tuma lugar diasabra 26 di februari 2022. E noticia aki a hala basta atencion unda cu hopi ta cuestiona e decision aki, pa motibo di pandemia y e fondonan cu mester wordo usa di otro manera. Varios encuesta, entre esun di noticiacla ta desaproba di e decision di e parade. Di otro banda, tin otronan cu ta positivo pa cu e parade y ta mustra cu mester por goza y ta liber pa haci esaki awor cu no tin medida mas. “Kico bo kier pa nos haci anto” ta entre e comentarionan di esnan cu ta pro pa e parada. No ta conoci cuanto hende ta participa ainda, pero te cu diahuebs, ainda tabatin gruponan cu riba e pagina di facebook di gobierno y nan propio pagina, tabata pidi hende ainda pa inscribi.