Debi na invasion di Ucrania, final di futbol Champions League no ta na Rusia mas

PARIS – E union di asosacion di futbol Europeo conoci como UEFA, a move e final di Champions League di Rusia pa Francia debi na e guera cu a inicia na Ucrania e siman aki. UEFA a anuncia nan paro di sponsorship cu e compania Ruso di energia Gazprom cu ta involucra tambe cu futbol. E wega final awor ta tuma lugar na Paris, envez di St Petersburg dia 28 di mei proximo na Stade de France. 

MAS PARO DI SPONSORSHIP

Futbol Europeo a tuma mas decision relaciona cu e invasion di Ucrania, ora cu e ekipo di Manchester United a para nan patrosinio cu Aeroflot y a forza ekiponan Ruso pa hunga weganan riba lugarnan ‘neutral’. Rusia a sigura cu UEFA ta hungando politica cu futbol.