Premier Wever na Noticiacla riba guera na Ucrania: Aruba ta preocupa pero prepara

ORANJESTAD – Gobierno di Aruba ta siguiendo e situacion na Ucrania hopi di cerca. Asina prome minister Evelyn Wever a confia na noticiacla diahuebs atardi. “Nos ta preocupa” e mandatario a sigui bisa. Mientras cu e no ta mira efecto directo pa Aruba, e ta papia si di efecto indirecto. “Prijs di crudo a spike y esaki por causa mas inflacion” e mandatario a bisa. Pues por spera un aumento grandi den prijs di productonan petrolero manera gasoline proximamente atrobe. No solamente esey, pero segun e mandatario, nos pilar number uno tambe lo sufri. “E guera por afecta nos turismo tambe” e mandatario a sigui bisa. 

PREPARA

Loke cu Aruba ta prepara pe, segun e mandatario, ta pa extra seguridad pa nos isla. “Tanto fisicamente como virtualmente” e mandatario a bisa, aunke e no a specifica ki tipo di seguridad e ta referi na dje. “Nos ta monitor e situacion y sinceramente awor no por haci nada otro, (cu) resa pa un resolucion” e mandatario a finalisa bisando riba e tema ey. Manera ta conoci diahuebs marduga ora di Aruba, trupanan di Rusia a invadi Ucrania y inicia e guera cu e pais cu un tempo a forma parti di Rusia.