Wever: Optimista cu diabierna si, RMR ta aproba sosten di likides pa Aruba

ORANJESTAD – Diabierna awor Conseho di Minister di Reino Hulandes ta dicidi si Aruba ta haya e sosten financiero cu e la solicita. Prome minister Evelyn Wever a confirma diahuebs atardi pa noticiacla, cu Aruba ta riba agenda y cu enberdad e decision tin cu cay diabierna mainta. “Mayan nos sa” e mandatario a contesta e portal aki, si enberdad Aruba ta haya e placa. Riba e cantidad cu Aruba lo haya, no ta conoci. “E lot a pa e prome cuartal di 2022. Mayan nos ta haya sa precies” e mandatario a bisa riba e suma exacto. 

SI ARUBA NO HAYA E PLACA

E chens ta, manera e ultimo dos reunionan, cu un biaha mas Aruba no ta haya e placa. Y si esey sosode, Aruba mes mester haci algo. Prome minister ta optimista.” Mi tin tur confiansa cu mayan nos lo haya bon noticia”. Di otro forma, Aruba ta haya su mes den un situacion fastioso, pero no imposibel. “Nos lo tin cu schuif cierto pagonan pa otro fecha, pero mi no ta kere cu esey lo pasa”, e mandatario a bisa cu siguransa. 

RECORTE SALARIAL

Loke tambe ta pendiente ta e desicion di Hulanda pa aproba e paro di e recorte salarial. No ta premira cu un contesta lo bin mayan. Por lo menos no uno cu ta bisa si Hulanda e biaha aki si ta bay di acuerdo pa para e recorte. Esaki pasobra a dicidi caba cu tanten cu tin e ayudo financiero, e recorte ta keda. Di otro banda, minister presidente Wever a splica tambe cu tin dos trayecto cu ta canando pa cu e tema. Un alternativa, ta pa bin cu un otro alternativa pa cu e recorte. Pero riba esaki, ta wardando riba e colegio di supervision financiero CAFt pa dicidi. E otro, ta cu ta insistiendo cu Hulanda, pa cuminsa deliberacionan pa e ‘afbouw’ despues cu nos no ta depende di e sosten di likides mas.