Aruba representa na Nacionnan Uni pa “Comision Status Woman”

NEW YORK - Den cuadro di dia Internacional di Hende Muhe dia 8 di Maart, y e “59th Commission on the Status of Women”, minister di enseñansa y famia, Michelle Hooyboer-Winklaar tabata presente na United Nations Headquarters na New York pa representa Aruba y duna presentacionnan relaciona cu e status di hende muhe riba nos isla. Hooyboer-Winklaar a encabesa e delegacion e prome dia durante Asamblea General debi na e ausencia di minister hulandes Jet Bussemaker  cu a yega New York mas laat den dia.

COMISION

E "Commission on the Status of Women" ta un organisacion inter-gubernamental di United Nations cu ta traha exclusivamente riba promocion di igualdad entre hende homber y hende muhe, cual a wordo estableci na aña 1946. Representantenan di Gobiernonan di rond mundo, NGO's y otro organisacionnan lo topa pa e siguiente 2 siman 9 pa 20 pa delibera y dialoga riba e tema di igualdad, "best-practices" pa combati violencia y discriminacion contra hende muhe, y con pa stimula mucha homber y hende homber pa eleva concientisacion di e temanan importante y busca partnerships hunto cu nan.

CONCLUSIONNAN

Durante e Asamblea General, Secretary General Ban Ki-moon y otro expertonan riba e tema di genero a hiba discursonan, elaborando riba e trabounan cu a wordo haci durante e ultimo 20 aña, despues di un reunion cu a tuma luga na Beijing China na aña 1995, unda gobiernonan a reestablece nan compromiso pa cu e tema di derechonan di hende muhe. Aunke tin varios progreso den areanan cu por midi, un conclusion clave ta cu ainda tin areanan unda progreso ta tardando demasiado of unda, den e area di violencia contra hende muhe mundialmente, ta aumentando tur rond di mundo. E punto di violencia ta un preocupacion grandi di UN y ta yama riba diferente stakeholders pa combati violencia contra mucha muhe y hende muhe.