Placa no a pasa pa gruponan pero tur cos ta cla pa Parada Nacional di diasabra

ORANJESTAD – Aunke cu e placa priminti pa gruponan di carnaval y bandanan participante no a yega nan destino ainda (te cu diahuebs mainta), gobierno ta sigui mustra cu tur cos ta cla pa e Parada Nacional di Luz di diasabra. Segun e vocero di e parade Lionel Dirkz, fayo administrativo a pone cu e suma priminti pa yuda cubri gastonan di e grupo y bandanan ainda no a wordo transferi pa e gruponan respectivo, pero cu esaki mester ta cla pa diabierna awor. 

PREPARACION 

Gobierno a informa y sigura diaranson cu e ultimo preparacionnan  ta tumando luga pa e Parada Nacional di luz di diasabra awor. Den cuadro di esaki ayera Minister di Cultura hunto cu Representantenan di Comision Celebracion Dianan Nacional a reuni cu e diferente stakeholdersnan pa e parada nacional di luz. Na e reunion importante aki tabata presente e representantenan di Cuerpo Policial, IMSAN, Cruz Cora, Departamento di Obranan Publico y Serlimar. Segun gobierno, e reunion ‘a bay den bon ambiente’ caminda a informa tur stakeholdersnan di e reglanan y a duna informacion riba tur pregunta relaciona cu e parada nacional di luz.

CERA CAYA

E cayanan lo wordo cera pa 6pm  y lo tin 125 polis trahando, Serlimar lo pone bari riba full e ruta y nan ta recomenda pa uza cupnan di plastic duro pa asina tin menos desperdicio.