Mortonan a cuminsa cay desde e invasion Ruso na Ucrania

KIEV – Desde 4’or di marduga e capital di Ucrania, KIEV y mas ciudad di e pais a experencia explosionan, cortesia di Rusia ora cu e invasion Ruso a inicia. Mes momento por confirma cu Rusia a invadi e pais Ucrania riba varios parti di e frontera. Segun Rusia, nan kier simplemente demilitarisa e pais, y ta purbando di ‘desconecta’ e pais militarmente y ataca solamente blanconan military. Ucrania ta contradeci esaki informando cu ta un invasion completo esaki ta. 

ATAKE

Desde cu a invasion a inicia, defensa Ruso ta sigura cu a tene 203 atake caba, y cu a destrui 74 blanco military caba. Ta trata di e.o. 18 stacion di radar, 11 pista di aterisahe y tres base di commando.  Segun Rusia, Ucrania mester bira un pais neutral sin arma ofensivo. 

UCRANIA

Segun banda di Ucrania, tin 40 militar cu a fayece, y decenas a keda herida. Tin por lo menos 18 civil cu tambe a muri a consecuencia di un atake di raket. Y den e ciudada Brovario, den e cercania di Kiev, tin por lo menos 6 morto civil. Di otro banda ta raporta cu a mata 50 soldat Ruso caba, y a derumba 6 avion den Oost di Ucrania.