Minister ta confirma cu tin impasse entre e y CEO di AAA

ORANJESTAD – A surgi un impasse entre gobierno di Aruba (lesa: minister di turismo Dangui Oduber), y CEO di aeropuerto Joost Meijs riba su maneho na aeropuerto. Principalmente tumamento di hende cu no ta cuadra cu e maneho palabra segun e mandatario. E CEO tin caso 2 aña y mei trahando na Aruba den su funcion. Un carta di sindicato STA (cu ta representa parti di e trahadonan di aeropuerto) dirigi na e mandatario, a alerte riba posibel practica contra good corporate governance, mas principal, metemento di e CEO den reclutacion di persona pa trabou cu no ta cumpli cu e profile di e vacatura disponible. E mandatario ta papia di ‘handpick’ persona cu ta na agrado di e CEO. 

LABORAL

E situacion pues ta segun e mandatario, cu e CEO lo ta mete den e seleccion di personal di aeropuerto, lagando otro personanan capaz for di e seleccion y ta selecta hende cu e CEO ta prefera personalmente. E sindicato ta informa e mandatario cu hende cu si ta cumpli cu tur rekisito, ta wordo laga un banda. 

BOARD

E mandatario a bisa di a manda avisa e directiva di AAA pa mas claridad unda cu kier por garantisa tur empleado cu tin un proceso transparente di solicitud pa trabou y cu e CEO ta mantene su mes na e reglanan di bon gobernacion. 

CEO

E mandatario a sigura e portal aki cu e la recorda e CEO tambe den e carta, cu e decision cu a tuma pa retira 75 persona for di AAA ora cu e pandemia a inicia, no tabata corecto y pa para e proceso ya cu gobierno tabata subsidia aeropuerto pa trahadonan keda na trabou. Segun Oduber, tabatin un diferencia di opinion grandi entre e accionistanan (gobierno di Aruba:red)  y e CEO e tempo ey, pasobra accionistanan ta para ariba cu tanten ta subsidia salario, no por permiti e compania pa retira 75 persona for di trabou. E tempo ey e CEO a para ariba cu e proyeccionan cu e tabatin, ta cu lo tin recuperacion te na 2025 y aeropuerto lo por recupera e ora ey pa por tin mas hende. Gobierno a diferencia di opinion y a mustra cu lo a bounce back hopi mas lihe. “Apesar di e diferencia di opinion, ignorando un instruccion cu shareholder a dune e tempo ey, e la sigui cu e reorganisacion, retirando asina 75 mama y tata for di trabou, usando 13 miyon di e compania”. E mandatario a sigui mustra con cos a bay y contrario na e pensamento di e CEO e tempo ey, Aruba a recupera miho y cu te hasta AAA a genera mas di 20 miyon florin na 2021 y a habri cantidad di vacatura bek  di e personanan cu e mes a opta pa retira. 

FRICCION

E mandatario ta papia di un friccion y indignacion crea entre su persona y e CEO awor, pasobra e mandatario a bisa e director pa warda ora gobierno stop subsidio y ricibi e ultimo proyeccion, y e subsidio para, e ora por sigui reorganisa si e situacion no mehora. E minister a sigui bisa cu a papia cu e CEO pero cu e CEO ta bisa cu gobierno no mester haci un ‘big deal’ di e situacion aki. E CEO segun Oduber, ta bisa cu e proceso a cana manera mester ta. Trahadonan sinembargo segun Oduber, ta bisa cu esey no tabata e caso. E mandatario ta papia di un grupo grandi di trahadonan cu ta indigna. E mandatario awor lo bay papia cu Schiphol Group cu ta esun cu a apunta Joost Meijs como director algun aña atras. E negosacion entre otro mester trece claridad riba e impasse aki y tambe cu e kier renegosha e contracto cu tin enre Aruba y Schiphol Group. A busca contacto e CEO di e aeropuerto pero ainda esaki no a logra.