Presupuesto 2022 di pais Aruba porfin a yega Parlamento

ORANJESTAD –  Presupuesto 2022 di pais Aruba despues di un retraso di 5 luna, a yega Parlamento porfin diamars, un dia despues cu e mandatario responsabel Xiomara Maduro a firma esaki. Na entrega di e presupuesto diamars atardi, sra Xiomara Maduro a bisa e presidente di Parlamento Edgar Vrolijk cu e lo haci tur posibel pa e presupuesto 2023 si wordo entrega pa dia 1 di September di e aña aki, conforme ley di comptabildad. Algo cu pa ultimo añanan no ta sosodiendo. E colegio di supervision financiero CAft a te hasta indica cu esaki a bira un ‘tradicion’ robez pa entrega e presupuesto laat. Aña pasa e mandatario a priminti cu lo entrega e presupuesto pa januari 2022, pero esaki no a sosode. Segun e mandatario, mester a duna espacio na e proceso, unda cu entre otro Raad van Advies y Caft mester a pasa door di dje prome cu entrega esaki na Parlamento. 

TRATAMENTO

Cu entrega di e presupuesto na Parlamento, ta cuminsa otro proceso cu tin cu cana, y for di e presidente, a compronde cu pa fin di luna di maart, por trata y posiblemente aproba e presupuesto e ora.