Arends: Trash 2 Cash ta permiti negoshinan recicla diferente material di desperdicio

ORANJESTAD – E proyecto Trash 2 Cash ta permiti negoshinan na Aruba recicla diferente material di desperdicio. Asina ta yuda deshaci di e problema na dump. Asina Minister Ursell Arends responsabel pa medio ambiente a anuncia diamars atardi. Den un tipo di ‘destaho’ otro luna, e companianan lo por presenta nan plan, y keda scohi pa por cuminsa cu e trabounan di reciclahe di e diferente material. Cu esaki ta converti e sushi den placa. Esaki ta e idea pa stimula mas negoshi pa explora e balor cu e materialnan procesa di reciclahe por tin, pa asina tambe mas por participa na e solucionnan grandi den Aruba su maneho di desperdicio. Prome cu reenforsa legislacion, mester crea e fundeshi solido den comunidad caminda tin infrastructura - diferente organisacionnan - pa procesa tur e diferente tiponan di desperdicio.

PITCH

Durante e simannan binidero por haci un "pitch" caminda cada individual of organisacion por comparti nan idea di con pa yuda reduci of cambia e destino di nos desperdicio via un video cortico na e website www.trashtocasharuba.org. \Aki un luna, dia 22 di maart durante "Trash to Cash" Waste Management Solutions su forum lo presenta e finalistanan di esnan cu a upload nan idea. Durante e forum lo haya e oportunidad pa pitch nan idea completo na un panel.