WEB: Cashflow ta delicado debi na gastonan halto no premira

ORANJESTAD – E cashflow di e compania di utilidad WEB ta ‘delicado’. Esaki a keda confirma awe un biaha mas pa e propio CFO (Chief Financial Officer) di e compania, -Lidia Beukenboom-, durante e presentacion di hedging na parlamento. Mientras cu a confirma e situacion malo financiero, a bisa mes momento si cu esaki no ta debi na e contractonan di hedging, sino otro factor. Asina Beukenboom a contesta un di e preguntanan di parlamentarionan awe merdia.

PAGANDO LAAT

Segun Beukenboom, debi na e situacion delicado financiero di WEB, nan ‘no ta pagando e leveranciersnan conform nos uiterlijk betaaldatum di 30 dia’. Pues e proveedonan di e compania ta hayando pago riba un fecha mucho mas laat. Motibo duna ta puramente operacional. Y aki tambe Beukenboom a duna mas splicacion.

BUSCANDO FINANCIAMENTO

E situacion financiero ta precario, debi entre otro pasobra WEB ‘tin gastonan mas halto cu a premira. Y WEB a financia su proyectonan cu fondo propio’. Pero aworaki segun e CFO, WEB ta buscando financiamento serca banconan pa asina logra sali for di e situacion precario. Unabes cu nan logra sigura e financiamento, nan por continua paga e proyectonan y drecha nan situacion financiero miho. No obstante e situacion ey, e prome dos lunanan di aña aki, e estado di e ‘profit and loss’ ta positivo.