WEB: Si no a hedge, lo a paga 25% menos na heavy fuel oil

ORANJESTAD – Minister Mike de Meza a wordo laga ‘afo di e proceso di hedging’, pasobra statuto di WEB no ta rekeri su aprobacion. No a dicidi con ta bay mitiga e daño causa pa e hedging. Si no a hedge aña pasa pa 2015, awe nos lo ta pagando 25% menos pa e ‘hfo’, osea heavy fuel oil. Y WEB so ta responsabel pa e contractonan di hedging sera. Algun di e puntonan atendi durante e ‘bijeenkomst parlamentario’ awe tardi, riba e contractonan di hedging di WEB. Durante algo mas cu 45 minuut awe, gerencia di WEB y Utilities a purba defende nan mes den Parlamento riba preguntanan di hedging. Preguntanan cu 15 parlamentario a haci pa por haya mas claridad riba e caso aki di hedging. Varios a haya contesta, y otronan a wordo referi pa minister di utilidad pa contesta mayan.

CHAIN OF COMMAND

Loke a keda confirma (basa riba contesta di representantenan di WEB), ta cu e minister encarga no tabata na altura di e contractonan di hedging, ni tabata necesario pa envolvi e mandatario den e desision aki. “Statutonan di WEB no ta rekeri esey” director di WEB , Oslin Boekhoudt a sigura parlamento awe tardi.

KIBRA CONTRACTO

Contractonan sera, por wordo kibra. Esaki tambe a keda confirma awe pa director di Utilities NV, Frank Hoevertz. Pero e tin un prijs. “Si bo bay kibra cualkier contract unilateralmente, bo ta schadeplichtig” e la bisa. Esaki ta nifica cu lo tin multanan cu e lo tin cu paga. No a bisa sinembargo si, cuanto e multa lo ta si kibra esaki.

KICO A BAY FOUT

E strategia di WEB tabata semper, segun Michel Janssen, pa proteha contra e parti ariba (aumento di tarifa) y wanta e parti abou, mas cu ta posibel. ‘Den e periodo di 2012 y 2014 e mercado no tabata duna e oportunidad ey’. A splica cu basa riba e informacion presente e tempo ey, mester a opta pa sera e tarifa di hedging, cu e risico cu si e prijs baha drastico, bo no por haci nada. Esaki a consecuencia di e termino di contracto cu nan a sera. Pues a proteha pa no subi tarifa, pero no tabata proteha pa por baha e tarifa.

PAKICO HEDGE MAS LARGO

E representantenan di WEB a splica tambe cu a opta pa hedge pa un periodo mas largo, pa asina garantisa y stabilisa e tarifa pa un periodo mas largo, a hedge pa e periodo mas largo. Antes tabata hedge pa 3 luna so, esta 30%, pero esey a cambia pa 90-95%. “Nos a stel vast den nos strategia cu esey ta 12 maanden” Janssen a bisa. Sinembargo den e caso aki nan a opta pa bay den e caso ‘extremo’ manera cu Janssen mes a bisa, cu tabata pa 36 luna. Esaki ta nifica cu e contractonan ta valido te fin di 2016. E hecho cu prijs di petrolio a baha aña pasa october, a pone cu WEB a sali di malo. Pero prome cu esey, WEB tabata protehi y e programa tabata presenta cifranan positivo. E decision pa alarga, segun Janssen, a resulta malo pa WEB.

MINISTER DE MEZA

E mandatario di utilidad no tabata presente awe den parlamento, pero lo duna cara mayan durante e reunion publico riba e mesun tema. Solamente esnan cu a haci pregunta awe, un total di 15 parlamentario, lo por haci mas pregunta na e mandatario. Ta mas bien e preguntanan politico cu a bin den direccion di gerencia di WEB.