Mama di damita herida den bringamento na scol y damita cu a agredi e victima, ta reacciona

ORANJESTAD – Un bringamento entre dos damita diamars ultimo na nan scol, di cual e video di e suseso a bay viral, a bira mas serio ora cu un di e damanan a keda interna den hospital y cu e mama di e damita interna, a haci denuncia na polis pa e aggression. E mama di e damita hospitalisa cu a identifica su mes como Zully Bedoya, diahuebs atardi a splica su version di kico a pasa diamars despues cu scol a termina na Maria College Mavo. Aki, segun su version, un otro damita, A.B,(15) lo a agredi e yiu muher di Bedoya malamente te cu e la termina inconciente riba vloer y despues hospitalisa. Segun version di e mama, e problema ta uno di bullying y ta algo cu ta andando varios luna caba entre su yiu y e otro persona (nan), y cu a culmina diamars merdia na e scol. E mama ta admiti cu e yiu tambe a haci malo, pero e forma con e cos a caba, no tabata corecto. E yiu a haya varios sla na curpa, y despues a perde conocemento riba trottoir pafo di scol,. E la keda hospitalisa y ta bou tratamento special aworaki. E mama a haci un yamada pa e asunto aki stop, y a haci denuncia na recherche, y ta pidi castigo pa esnnan cu a maltrata su yiu. Cu pancarta para dilanti di hospital, e mama a haci su peticion e ora pa husticia. 

E OTRO BANDA

Mientrastanto, e persona cu a agredi e yiu di sra Bedoya, esta A.B (15) , a reacciona riba su pagina di Facebook, riba e suceso. Entre e loke e la bisa e ta admiti cu e loke e la haci no tabata bon, pero cu e la haci e pa un motibo. “ Obviamente cu mi sa cu loke ma hasi no tawata bon. Obviamente mi tin berguensa di ta riba social media aworaki pero bin den mi sapato y sinta pensa dicon ma hasi  esey prome bo bay comment yen k*k*," e ta sigui bisa. Segun e dama en cuestion, esun cu ta victima awor, tabata insulte tur dia den klas dilanti docente y nada no tabata wordo haci. Palabranan malo lo e tabata tira den direccion di A.B. Segun e, el a duna keho pero no a tende nada mas. A bisa tambe cu e mama (esta Bedoya) tambe lo tabata baha na scol y punta dede bisa yen di cos pero cu e damita a opta pa keda keto pa respet. E dama ta sigui splica cu segun e, tabatin intentonan pa remedia e situacion pero na final, cos a bay di forma cu e no a wanta mas y a agredi e otro damita. Ademas e damita ta reclama tambe cu a plama e video, y ta comenta sin cu hende sa kico realmente a pasa.