Encuesta: 'No' na Parada Nacional y 'Si' pa Carnaval 2023

ORANJESTAD – Segun un encuesta entre usuarionan di Noticiacla.com, un mayoria cu a participa no ta di acuerdo pa tene un parada aworaki manera cu a keda anuncia siman pasa diabierna. Ademas un mayoria tambe ta contra cu gobierno ta pidi pa esaki keda financia pa companianan semi gubernamental. Un mayoria di esnan cu a participa, ta haya cu mester warda otro aña y tene e carnaval regular den 2023. Un total di 980 persona a participa entre dialuna y awe diahuebs mainta, di cual mayoria tabata hende muher (53%). 

E META

Manera anuncia, e biaha aki e tema di encuesta tabata riba tema carnavalesco y e decision politico pa tene un parade di luz. Siman pasa gobierno di Aruba a anuncia cu lo tene un parade nacional di luz, cu e intencion pa ‘jumpstart’ nos carnaval 2023. Cu e anuncio aki, a los hopi comentario riba e momento, sigur teniendo na cuenta cu ainda aunke menos, ta atendiendo cu e pandemia mundial. Ademas, tin retonan financiero cu ta preocupa cierto gruponan den nos comunidad. A base di esaki, a dicidi di scucha e siguidornan primordialmente di noticiacla riba e tema aki. 

RESULTADO

E prome pregunta tabata kico e usuario ta pensa di e anuncio pa tene un parade nacional di luz fin d luna awor na Aruba. Aki entre esnan cu a participa, 80% a bisa cu nan ta contra, 16% a bisa cu nan ta di acuerdo y 4% a bisa cu nan no sa.

Despues a puntra kico ta pensa di e hecho cu gobierno a informa cu varios departamento semi gubernamental manera p.e. ATA lo inverti pa logra e suma di 100 mil florin pa e parada, 82% a contesta cu nan no ta di acuerdo, mientras cu 14% a contesta cu nan ta di acuerdo.

A sigui cu e pregunta kico ta pensa e ora riba e idea pa tene actividadnan carnavalezco e aña aki pero na juli manera cu a propone. Aki e grupo cu a rechasa e idea tabata menos cu esnan cu a bay contra e parade nacional. Pero asina mes, e mayoria di esnan cu a contesta e pregunta aki, 69% a bisa cu nan ta contra mientras cu 22% a bisa cu nan ta di acuerdo. Y 9% a bisa cu nan no sa.

Ora cu a puntra si a pensa si ta cla pa organisa carnaval normal bek pero na 2023, esnan cu contesta e pregunta aki mayoria 81% a contesta cu nan ta di acuerdo, mientras cu toch ainda tabatin 9% cu tabata contra y un grupo relativamente ‘halto’ di 11% a bisa cu nan no tabata sa. 

EDAD

Den e parti di edad di esnan cu a participa, por bisa cu mayoria cu a participa tabata den e edad entre 44-54 aña (30%), sigui pa e grupo di 55-64 aña (24%) y 33-44 aña (22%). Notable ta cu e grupo cu normalmente ta basta vocal tambe, esta esnan mas hoben entre 18-24 aña y 25-34 aña no tabatin hopi interes pa participa den e encuesta aki e biaha aki. E cantidad ta asina bou cu e no ta ni yega 1% di participacion. 

DISCLAIMER

Manera semper, e resultado ta pa metanan puro noticioso. Ademas, tambe, no ta pretende cu e resultadonan obteni ta un refleho di Aruba completo, sino di usuarionan cu tin aceso na e portal noticiacla