Varios grupo conoci no ta forma parti di Parada di Luz nacional, otronan si

ORANJESTAD – Varios grupo conoci y popular di carnaval a opta duna oido na e yamada di goberno pa participa na e Parada di Luz nacional di otro siman diasabra 26 di februari 2022, mientras cu un otro parti di grupo, a opta pa no participa. Entre e motibonan cu a duna, ta cu tempo tabata mucho corto te na cu a cera e inscripcion prome cu por a inscribi. E prome grupo cu a anuncia cu nan no ta participa ta Los Laga Bai, cu for di 12 di februari a participa esaki. Segun e splicacion di e grupo, ‘Tempo ta cortico y logisticamente nos no ta prepara y cla pa un parada aki dos siman’ e grupo ta cuminsa na bisa. ‘ Nos ta depende di hopi otro hende pa haci diferente trabou vooral na nos bar y band trailernan. Nos grupo a dicidi pa focus pa Carnaval 2023 pa asina sigui brinda nos participantenan e ambiente y servicio cu nan merece. Ora nos bay…. ta pa bay bon !!!’ e grupo a bisa. Un otro grupo cu a laga sa cu no ta bay ta Champagne, unda cu e lider a declara e siman aki, cu hunto cu e grupo T.O.B (Touch of Brazil) a dicidi cu nan no ta participa debi na e reglanan imponi, cu no ta funciona bon pa nan structura conoci. Entre nan, limitacion di cantidad di participante, y tambe e cantidad di bar cu ta permiti. Falta di banda musical tambe tabata un factor. For di e OPC Group di Claudius Phillips a compronde cu nan kier a participa, pero ora cu a bay inscribi, e inscripcion a cera caba, lagando nan afo. Gruponan cu ta conoci cu si ta participa, ta Dushi Group y Empire. E parada ta otro siman diasabra, cuminsando for di 8or di anochi te 2’or di marduga. 

PROME MINISTER

Prome minister Evelyn Wever a reacciona riba e momentum aki, y a mustra cu e ta gradici esnan cu a opta pa participa y ta compronde esnan cu no kier participa of no por participa. A mustra cu ta keda na cada ken pa participa of no. Esnan cu ta sinti pa participa, dal bay y esnan cu no kier participa, tambe por keda sin participa. Potretnan cortesia di Aribaaruba Media.