Rapport riba Hedging di WEB ta conoci! Lese aki

ORANJESTAD – WEB mester finalisa su plan di accion lihe pa por reduci e efectonan negativo cu e contractonan di hedging pa 2015 y 2016 tin. E comision responsabel pa e feitenonderzoek riba e contractonan di hedging, a presenta un total di 6 recomendacion pa WEB, pa nan ehecuta y asina purba minimalisa e daño causa. For di e resultado di e rapport, ta sali na cla cu cos no a bay bon, no tabatin transparencia y cu mester trece cambio lihe den e asunto di contractonan, unda cu por. E rapport extenso di 58 pagina, ta relata detayadamente kico tur a sosode, y mas importante, e consecuencia di e accionnan tuma relaciona cu e asunto di hedging.

HISTORIA DI HEDGING WEB

Segun e rapport, e historia di actividad di hedging na WEB ta wordo parti den dos periodo. E periodo inicial ta termina na 2009 y e di dos periodo ta inicia na 2012. Aki ta sali na cla cu den e prome periodo, a acudi na un hedging mas ‘conservativo, di apenas 30% di e volumen rekeri. Cada biaha a hedge pa periodonan di apenas 3 luna. Y na 2009 WEB a dicidi pa para esaki.

AUMENTO DI HEDGING

Un di dos periodo di hedging a inicia na 2012, pero no a keda aproba manera originalmente stipula pa e gerencia di WEB, sino mas bien a keda ahusta pa e hunta supervisorio. Durante e periodo aki, a scohe un volumen di hedging di entre 90 pa 95%, compara cu e periodo anterior (di 30%). Esaki tabata basa riba e deseo pa WEB pa tuma mas bentaha di e posibilidadnan brinda di hedging e tempo ey, y pa minimalisa e risico relata na e prijs di heavy fuel oil, mas cu ta posibel.

RECOMENDACIONAN HACI

Como recomendacionnan haci na WEB, a sugeri pa WEB finalisa nan plan di accion actualmente den evaluacion, cu tin cu yuda mitiga (reduci) e efectonan adverso di e contractonan activo ainda pa 2015 y 2016. Tambe ta recomenda WEB pa considera e set up di un revision di e proceso di aprobacion, referente na e hedging, compara cu e proceduranan actual formalisa. Tambe ta conseha WEB pa implementa momentonan periodico di entrega di informacion transparente, y /of discusion pa informa e interesadonan di WEB su actividadnan di hedging y su consecuencianan, enves di haci esaki solamente ora cu tin pregunta.

MAS RECOMENDACION

Tambe ta recomenda WEB pa coregi e strategia formalisa di hedging pa coincidi cu e actividadnan segun cu nan ta tuma lugar den practica. Esaki ta inclui documentacion formal y e responsabilidad di e team di hedging, gerencia y conseho di supervision. Nan ta pidi tambe pa WEB considera emplea un specialista di Hedging of busca un di dos opinion pa valida e consehonan di e compania encarga cu e hedging. Tambe ta recomenda pa WEB mehora e standariza e proceso di tuma decision referente hedging. Lesa e rapport completo aki.