Shimis ‘colorido’ di secretario di estado van Huffelen ta di un amigo diseñador

ORANJESTAD – Porta loke a haya mas atencion cu a spera durante e prome bishita di e secretario di estado Hulandes Alexandra van Huffelen na Aruba (y otro islanan), tabata su vestuario envez di e temanan di conversacion. Noticiacla a compronde cu no ta na Aruba so sino for di momento cu e mandatario a inicia su bishita na Corsou. Pero na Aruba esaki a haya atencion total, ora cu diaranson e secretario tabatin un shimis cu hopi a cualifica como un disfras di carnaval. E portal aki a compronde cu tur trahe di e mandatario tin durante su bishita, ta diseña pa un bon amigo di dje, conocido diseñador Peter George D’Angelino. Diahuebs tambe e tabatin uno hopi colorido mes, cu e la luci durante e.o. e conferencia di prensa na clausura di su bishita na Aruba, y tambe durante bishita na Parke Arikok y Ministerio Publico.

CARNAVAL

E comentarionan a bay viral, sigur den cuadro di e hecho cu tin un parada nacional di luz na caminda. Comentarionan manera cu ‘e la bin cla pa e parada’, ‘e la bin mucho tempran’, ta solamente algun di e hopi comentarionan cu a keda comparti riba rednan social. E mandatario durante un conferencia di prensa te hasta a haya e prome pregunta di un miembro di prensa dirigi riba su vestuario original. E mandatario e momento ey cu un sonrisa, a comfirma e diseño di su amigo D’Angelo.