Casa Cuna Progreso a subraya e urgencia pa ayudo na secretario di estado Van Huffelen

ORANJESTAD – Casa Cuna Progreso mester di ayudo financiero di Hulanda y tambe gobierno pa por sigui. Esaki ta e mensahe principal cu e directora Renate van Dongen a duna e secretario di estado Hulandes nobo pa Asuntonan di Reino Hulandes Alexandra van Huffelen. Noticiacla tabata e unico medio invita pa e bishita aki di e mandatario y a presencia e presentacion. “Nos mester di e ayudo. Den cualkier forma” van Dongen a bisa na final di su presentacion cu e la duna cu hopi pasion. E suma cu ta wordo calcula pa dia pa cada mucha cu ta keda na Casa Cuna, ya no ta suficiente y e placa cu nan ta ricibi, no ta suficiente. E directora a duna un bista amplio di e situacion di e facilidad, y loke a resalta, ta e motivacion pa logra un monton di cos, pero cu tambe tin un desafio grandi pa logra e meta debi na e situacion financiero. 

INTERES

E tipo di pregunta cu e mandatario Hulandes a haci tambe durante e presentacion, ta mustra cu rapidamente e la compronde e seriedad di e situacion y no solamente e impacto cu e facilidad tin si no haci nada, y cu mas importante, e efecto ta pa e isla completo, mirando e limitacion cu tin na e tipo di ayudo cu muchanan cu tin necesidad pa un facilidad asina na Aruba. Na final, a haci cierto tipo di promesa limita na kico por spera di tanto gobierno na nivel local pero tambe Hulandes. Pues sigur e presentacion a haci su trabou. Y ta cuestion di tempo pa wak con liher Casa Cuna Progreso por haya su atencion necesario.