Van Huffelen: Aruba ta un isla bunita pero cu problema serio di pobresa, y deficiencia den enseñansa

ORANJESTAD - Den un frase, e secretario di estado Hulandes nobo encarga cu Relacionan di Reino Alexandra van Huffelen a describe su bishita: Bunita hende isla, naturalesa, ricibimento caluroso y hopi cos pa haci. Esey e la bisa riba peticion di e noticiacla, durante su prome entrevista na prensa local diaranson atardi. Tabata na final di su bishita na Casa Cuna Progreso, cu e la papia cu noticiacla. Despues di e frase bunita, e mandatario su tono y expresion a cambia mesora si, y a atende e realidad duro. E por ta nobo, y tabata apenas un dia y mei riba e isla. Pero no a tuma e mandatario mucho pa atende cu e realidad duro tambe: ”Tin problemanan serio di pobresa, deficiensia den enseñansa, economia mester drecha” ta entre e cosnan cu e mandatario a menciona cu a hala su atencion. Pero ainda e no sa cua lo tin prioridad, ya cu su bishita no tabata cla ainda pa e dicidi e lista cu mester traha pa atende cu ne. 

BISHITA

A percura pa yena e agenda di e mandatario mas hopi posibel, pa dune un bista amplio di tur loke ta pasando. Bon y malo. Loke a hala atencion ta cu a hinca dos ‘evento’ aden cu no tabata programa, manera un bishita na habitantenan di Parkietenbos pa e haya un idea di e situacion eynan. Tambe a hinca un reunion di mei ora cu representantenan di varios sindicato diaranson atardi, pa asina sigui papia e.o. riba e recorte salarial. Aki e mandatario mes lo tende di e sindicatonan kico nan preocupacion ta. Unabes cu e mandatario finalisa su bishita, e lo tin un bista amplio y  por husga pa su mes, kico ta pasa na Aruba pa e por ‘humanisa’ e situacion un poco miho ora cu tin cu tuma decision mas despues cu ta afecta e islanan. E mandatario ta keda un dia mas riba e isla y ta bishita dos lugar mas diahuebs, pa despues clausura su bishita cu un conferencia di prensa pa despues e sali pa Isla Riba. Scucha e entrevista AKI.