Van Huffelen: A papia riba recorte salarial pero no a dicidi nada ainda

ORANJESTAD – A papia riba recorte salarial y lo sigui papia riba e tema aki cu otro. Pero, manera por a spera, nada concreto no a keda dicidi durante e bishita cortico aki di e secretario di Estado Hulandes Alexandra van Huffelen na Aruba. Noticiacla tabata e prome media cu a haya un chens pa papia cu ne durante su programa ocupa diaranson atardi. Den e caso aki tabata na final di su bishita na Casa Cuna Progreso, cu e mandatario a contesta algun pregunta di noticiacla. Durante bishitanan di conocemento manera esaki, no ta usual cu ta trata temanan grandi manera esaki, pero Aruba a hacie un punto pa trata esaki toch, poniendo e tema di recorte di e.o. recorter salarial riba e agenda, probechando di e bishita di e mandatario.    

RECORTE DI SALARIO

Na momento cu e mandatario a papia cu e portal aki, a compronde cu mas despues atardi, lo e tabatin un combersacion no planea cu e sindicatonan riba e tema e.o. di e recorte salarial. Mientrastanto e mandatario Hulandes a confirma pa noticiacla cu enberdad a papia riba e tema. Hopi nobo no a sali afo, pero solamente cu loke ta confirma ta cu por lo pronto e recorte ta keda pa duracion di e sosten di likides. Pero a bisa tambe awe cu lo papia cu otro (Hulanda y Aruba) si, pa wak si por duna otro contenido na e recorte y cu Hulanda no tin porblema pa evalua esaki. “Y nos lo sigui papia riba e tema aki tambe”, e mandatario a sigui bisa. Pues, durante e bishita aki, ainda, no a logra convence e mandatario (lesa: Hulanda)  pa para e sosten manera solicita of bin na algo diferente, sino cu ‘lo sigui papia con ta cambia e contenido. Tambe con esaki ta bira despues cu e sosten di likides termina. 

COMPRENSION

Riba e pregunta cu si durante su bishita na Aruba, e por tin un miho comprension pa e problema, e mandatario a bisa cu si. “Mi ta compronde hopi bon cu si bo tin cu entrega bo salario, cu esaki ta fastioso pa tur hende, sigur si bo salario ta abou. Pues nos tin mira e cos aki bon” e mandatario a sigui bisa. Mes momento e ta mustra cu economia di e isla no ta bayendo bon, y mester haci cos pa corta gasto pa tambe tin un economia fuerte pa e isla. “Nos mester haya e balansa y lo papia cu e sindicatonan pa wak con pa haci” e mandatario a sigui bisa.”Ta mucho tempran pa bisa (ki dia ta para e recorte salarial)” sra van Huffelen a sigui bisa. A puntra e mandatario si no ta cuestion di si ta hacie of con, sino ki ora. Segun e mandatario, e kier sigui e tema di combersacion. A mustra mesora cu Hulanda a indica caba cu esaki ta un condicion hopi importante pa e otorgamento di e sosten di likides, pues no por kita esaki sin mas. “Nos por wak si con diferente nos por atende cu esaki” e mandatario a sigui bisa. Scucha e entrevista AKI.