Secretario di Estado van Huffelen a inicia reunion cu gobernantenan di Aruba

ORANJESTAD - Diaranson 16 di februari mainta, Secretario di Estado Alexandra van Huffelen a yega Bestuurskantoor pa reuni cu Prome Minister Evelyn Wever-Croes y despues cu Conseho di Minister. Prome Minister Evelyn Wever-Croes a ricibi Secretario di Estado Alexandra van Huffelen na Bestuurskantoor. Durante e prome encuentro aki a trata entre otro e relacion en general y e desaroyo positivo di nos pais. A trata tambe e recorte di 12.6% di salario y Prome Minister a subraya e importancia pa brinda perspectiva na empleadonan di sector publico y semi-publico cu lo stop e recorte. 

Prome Minister a expresa cu, aunke tawata un bishita pa Secretario di Estado conoce e banda aki di Reino, temanan hopi importante a wordo trata durante e prome encuentro aki. Siguiente reunion ta cu tur Ministernan di Conseho di Minister di Aruba. Tin hopi anticipacion pa e prome encuentro entre Prome Minister y Secretario di Estado. Un bon Relacion den Reino ta importante pa e recuperacion di Aruba. Secretario di Estado van Huffelen ta haciendo bishita na paisnan di Reino den e parti di Caribe. Prome cu Aruba, van Huffelen a bishita Corsou y Boneiro. Despues e lo sigui pa Sint Maarten, Saba y Sint Eustasius. E intencion di su bishita ta pa e cera conoci cu e islanan y e gobernantenan pa asina conoce otro y establece un relacion tambe pa sigui traha hunto den e proximo periodo nos dilanti.