Trahadonan di prizon KIA a bay den accion awe mainta

SANTA PATIA – Trahadonan di e instituto coreccional di Aruba KIA (prizon) a bay den accion diaranson mainta como protesta pa e maneho di e actual director Gino Winklaar. Segun presidente di sindicato TOPA, Rene Bernabela, e situacion no ta bon y e trahadonan no kier traha mas cu e director y kier pa gobierno kite. A compronde cu varios trahado lo kier traslado pa otro departamento, contal cu nan no traha cu e director. 

KEHONAN CONTRA E DIRECTOR

Tin por lo menos 10 punto di atencion cu e trahadonan a atende durante e reunion cu nan a tene pafo durante ora di trabou, cu ta ensera entre otro e hecho cu e director no ta na trabou na KIA sino na cas y of otro caminda y esey no ta posibel. E siman aki e portal 24ora a raporta cu e director lo ta na cas relaciona cu menasa di morto contra dje y a consehe pa e no ta presente por lo pronto den e facilidad. Tin keho tambe cu varios trahado a bay les y despues no a haya promocion priminti. A priminti un asina yama ‘open door policy’ pero esey nunca a bira realidad segun e trahadonan. Tambe e trahadonan ta disgusta cu e director tin e organisacion tranca, y lo ‘kier dicidi riba futuro di cada hende’, y ta director lo ta dicidi ken ta haya funcion y na unda. Algo cu e trahadonan ta protesta contra tambe. A pidi tambe pa un management team te ora cu keda cla cu e reorganisacion di KIA. Esey ta algun di e 10 puntonan menciona durante e reunion di awe mainta. Intento pa un reaccion di e director ainda no tabata exitoso. E noticia aki ta den proceso.