Minister Oduber: Gremionan no ta consecuente ora cu nan critica parada nacional di luz

ORANJESTAD – Minister di turismo Dangui Oduber no a aprecia e reaccion di gremionan comercial (y posiblemente esun cu un sindicato a manda anteriormente tambe) cu a ‘desaproba’ e decision pa tene un parada nacional di luz aki dos siman. E gremionan (y mas prome un sindicato tambe) a manda un voz di desaprobacion fuerte diamars riba e tema. E mandatario a reacciona brevemento riba su cuenta di Facebook y ta haya cu mester ta consecuente.

E COMENTARIO

E mandatario a bisa cu e tabata ‘hopi contento di mira con algun mil turista a celebra superbowl diadomingo ultimo na nos hotelnan’. “Ora mi mira lobbynan yen, restaurantnan yen, beachnan yen y cayanan druk, ta un señal positivo pa nos economia” e mandatario ta sigui comenta. 

CRITICA RIBA GREMIO

Despues e mandatario ta cuestiona e desaprobacion di e gremionan. “Mi no a scucha ningun preocupacon di parti AHATA of gremionan pa cu cualkier riesgo cu tin e ora ey. Pero ora ta trata un celebracion cultural pa nos propio hendenan, nan ta contra y nos ta irresponsabel.    

INSINUACION

E mandatario ta bisa tambe despues den un reaccion pa e portal aki, cu gremionan ta insinua cu gobierno no ta bai elimina medida siendo cu nos exit strategy ta hustamente dirigi pa elimina tur medida y bolbe bek na normalidad. “Nan como gremio comercial ta representa pa ATA den crisis team y ya caba a dicidi cu lo bai elimina medidanan. Kiermen pa mi ta hopi straño cu esaki ta wordo insinua siendo nan mester por ta na altura di esaki. Exit strategy a wordo presenta mas cu 1 luna pasa y conforme planificacion nos ta ehecutando esaki. Mundo ta bolbiendo bek na normalidad y Aruba tambe ta moviendo den e direccion aki. Nos mester semper keda consecuente den nos accionan” e mandatario ta finalisa bisando.