Sector medico ta bati alarma pa AZV su introduci di ‘contribucion propio’

ORANJESTAD – No obstante cu algun representante di un grupo di 11 proveedor di servicio medico na Aruba a papia caba siman pasa cu minister di Salud Dangui Oduber riba nan preocupacion riba e.o. e tema di introduccion di e asina yama ‘contribucion propio’, osea ‘eigen bijdrage’ anuncia pa AZV recientemente, toch nan a manda un carta pa gobernantenan local di cual e minister ta forma parti di dje. Den e carta manda nan gradici e minister si pa su atencion duna nan e tema durante nan reunion recien. 

TEMA

E carta ta toca specificamente e parti di contribucion propio pa e parti di specialista, laboratorio y remedi na botica sugeri pa AZV. Notable ta cu contribucion propio pa Eerste Hulp no ta wordo menciona den nan carta ya cu a compronde cu pa esaki, nan a sugeri un otro forma caba den un documento anterior (rapport zorgcomissie). Nan ta cuestiona no solamente intencion, pero mes momento ta sugeri un solucion pa esaki di un forma mas responsabel. 

HOPI PREGUNTA

E carta di 6 pagina ta cuminsa papia di e preocupacion cu e sector di cuido medico cu lo wordo afecta directamente cu e medida aki lo tin. Loke ta sali afo ta e echo cu ainda tin hopi pregunta y inseguridad rond di e tema aki cu mester haya claridad pasobra nan no a wordo consulta ainda pa AZV riba e tema. Mester bisa si mes momento, cu director di AZV mes , esta Edwin Jacobs a admiti na noticiacla recientemente cu berdad e veld medico ainda no a wordo consulta pasobra ‘no ta toca nan ainda’. E grupo ta referi na esey tambe (esta cu nan a keda den ‘scuridad’, sugeriendo cu un acto asina ta crea ‘intrankilidad y incertidumbre’. “Te cu 8 di februari 2022 (fecha cu a reuni cu e minister di Salud:red) por a deduci for di prensa solamente cu lo introduci contribucion propio, con halto esaki lo mester ta y pa cua instancia medico esaki lo mester ta” e carta ta sigui bisa. Nan ta pidi como tal mas informacion y a pidi pa den maximo dos siman, reacciona riba e serie di 25 pregunta cu ta haci den e carta aki y e observacion haci. 

EHECUCION

Tambe e grupo ta mustra y ofrece con por ehecuta e plan cu AZV tin, den un forma cu ta miho pa tur hende. Nan ta puntra prome si, con AZV tin pensa di legalisa e introduccion aki. Ta haci mencion di dos posibilidad di cual uno ta cambio completo di e ley di AZV, cu ta rekeri mas trabou, mientras cu esun mas facil ta ‘adaptacion’ di un articulo di e ley (articulo 22), y ta duna un sugerencia con den tres parti (A, B y C), por logra cu AZV ta cobra e suma extra aki, sin crea mucho problema. “Den tur tres situacion menciona, pais Aruba por compensa e gruponan cu obhetivo specifico. Mirando cu ta trata di un posibel introduccion cu mester drenta na vigor dentro di apenas 2 luna, ta spera pues cu den 2 siman caba, e grupo di instancia medico por haya un contesta. Lesa e carta AKI.