Secretario di estado Hulandes van Huffelen dispuesto pa trata concepto ‘geschillenregeling’ atrobe

DEN HAAG – Secretario di Estado Hulandes Alexandra van Huffelen ta dispuesto pa atende cu e asunto di geschillenregeling (areglo di disputa) entre e paisnan di Reino Hulandes. Asina e la bisa Eerste Kamer den un carta recientemente. Manera ta conoci, aña pasa, su predecesor a kita e concepto di e ley cu tabata riba mesa, pasobra no tabatin sentido pa sigui discuti, ya e paisnan Aruba, Corsou y St Maarten a protesta contra su contenido. Awor cu tin un secretario di estado nobo, esaki a mustra cu ‘no ta pasobra a recova e ley aña pasa, cu no por sigui trata e tema’. E ta recorda cu den e ultimo encuentro Parlamentario di Reino (IPKO), e delegacionan di e 4 paisnan a palabra cu lo pidi nan respectivo gobiernonan pa bin cu un iniciativa nobo pa un geschillenregeling. “Mi ta warda e resultado di e iniciativa y ta mas cu dispuesto pa delibera riba esaki” e mandatario a sigui bisa. E mandatario ta yega Aruba diamars pero no ta sigur cu e tema aki lo keda discuti, mirando cu ta trata di un bishita di conocemento, unda cu temanan oficial no ta riba agenda.