Aunke e ta bishita di conocemento, lo trata recorte salarial cu secretario di estado van Huffelen

ORANJESTAD – Aunke cu esaki ta un bishita di ‘conocemento’ di e secretario di estado Hulandes Alexandra van Huffelen, premier Evelyn Wever tin riba agenda un tema formal, cu ta e recorte salarial di 12.6%. Normalmente ora cu tin un bishita di conocemento, no tin un agenda formal. Pero lo probecha toch pa adapta esaki. Awe e bishita di e mandataro Hulandes ta inicia na Aruba pa un duracion di 2 dia. 

AGENDA FORMAL

Riba su agenda durante su bishita na Aruba, Van Huffelen lo reuni cu Gobernador. Despues e lo reuni cu Prome Minister Evelyn Wever-Croes y despues lo reuni tambe cu henter Conseho di Minister. Tambe e tin reunionnan cu Presidente di Parlamento, cu Banco Central, cu personanan cu ta representa e sector turistico, comercial, cuido y lo atende tambe cu nos artistanan local cu ta un gesto hopi bunita di su parti. Van Huffelen lo bishita Casa Cuna y Parke Nacional Arikok pa asina e haya un miho bista di kico tur ta biba na Aruba. 

PUNTO IMPORTANTE 

Manera ya indica, esaki ta e prome bishita di Van Huffelen pa e conoce y no un bishita pa trata temanan cu ta habri den extenso. “Aruba sinembargo a prepara algun punto importante riba agenda. E punto mas importante aworaki ta e recorte salarial” e mandatario a bisa den un comunicado e siman aki. Manera ta conoci, epeticion di Aruba pa nos stop e recorte e aña aki, a wordo nenga den e reunion di Conseho di Minister di Reino. 

PALABRACION

“Sinembargo nos a palabra cu nos lo bay sigui papia pa mira con nos por yega na loke nos ta yama ‘afbouwen van de versoberings maatregelen’. Nos tur sa kico a pasa ora cu Covid a bati na nos porta. Hulanda a bisa nos tin cu baha nos gastonan di personal. Nos a bay cu un proposicion y awor Hulanda a mara esey como un condicion pa nos haya sosten di likides. Pues tanten nos ta haya e sosten di likides, nos mester sigui corta e 12.6%”, Prome Minister a duna di conoce.

Prome Minister a enfatisa cu Gobierno kier brinda perspectiva na sector publico y semi-publico. E perspectiva di ki dia ta stop e recorte. Siman pasa huez tambe a duna Gobierno rason pa cu esaki y ta importante pa brinda perspectiva, pa tin un bon bista ki dia esaki ta caba. Esaki ta un tema cu sigur lo wordo papia cu Secretario di Estado. Tambe Prome Minister a haya peticion di sindicato TOPA nan tambe haya un reunion cu Secretario di Estado Van Huffelen. Ta importante pa bisa cu no ta Gobierno ni Prome Minister Evelyn Wever-Croes ta regla e agenda di e Secretario di Estado sino VNO. “Pero lo tabata berdad bon si e por scucha di e sindicatonan pero mi ta compronde cu talves esey no ta posibel”. 

Riba agenda di Aruba tambe ta poni e tema di e debe cu Hulanda y con Aruba lo paga e debe bek. Aruba a presta 1.2 biyon florin di Hulanda y Gobierno kier yega na areglonan cu ta faborece Aruba den repago di e debe aki. Prome cu Covid ya caba e debe tabata redobla pa motibo di mal maneho di e Gobierno di AVP y e crisis di Covid a bin acerca. “Esaki tambe ta un punto hopi importante pa Aruba pasobra ta depende di e repago aki di e debe di Hulanda, con lihe nos ta bay sali di e crisis aki”, Prome Minister a enfatisa. “Mi ta premira cu e reunionnan riba agenda cu Secretario di Reino van Huffelen ta bay ta reunionnan positivo, ohala tambe cu e resultado ta hopi fructifero”, Prome Minister Evelyn Wever-Croes a duna di conoce.