Homber haya morto cu arma di candela na Tanki Leendert

ORANJESTAD – Un homber a wordo haya sin bida na su cas na Tanki Leendert diamars anochi. Bisiña nan a avisa autoridad cu a bin haya e homber drumi tur na sanger, sin bida y un arma di candela banda di dje. Polis a cera e area pa cuminsa nan investigacion mesora, mirando cu e caso ta uno sospechoso. Tin indicacion cu e homber lo por a pone fin na su bida, aunke tin e posibilidad tambe di un caso di asesinato unda cu e arma por a wordo laga eynan. Pues no ta confirma ainda si ta un caso di suicidio of si ta un caso di un asesinato. Mientrastanto polis a envolvi personal di slachtoffer hulp pa atende cu e famia di e fayecido. E identidad di e persona no tabata conoci ainda. NoticiaCla.com ta manda palabra di pesame na famia di e fayecido.