ATA no ta paga pa full e 100 mil florin pa e parade nacional, sino un parti

ORANJESTAD – No ta e intencion pa oficina di turismo di Aruba (ATA) paga e suma completo di 100 mil florin como contribucion pa e parade nacional, cu tin cu ‘jumpstart’ e carnaval di Aruba proximamente. Asina directora di ATA Ronella Croes a clarifica dialuna pa noticiacla riba pregunta di e portal. A haci e pregunta mirando cu tabatin e percepcion cu gobierno a pidi ATA pa cubri full e suma aki.  Nan ta simplemente contribui un parti, pero e cantidad ainda tin cu wordo determina. Minister di Cultura Xiomara Maduro a confirma dialuna mainta tambe pa e portal ako cu enberdad e otro departamentonan di gobierno tambe lo aporta, aunke no a specifica cuanto. 

ULTIMO ORA

E decision pa cu e parada aki, a wordo tuma dabierna mainta durante e reunion di e dia ey di conseho di minister. ATA su CEO a confirma awe mainta tambe na e portal, cu manera e la informa diabierna tambe den e conferencia pa anuncia e evento, cu ta e diabierna merdia ey e mes a wordo acerca pa gobierno cu e peticion pa contribui na e evento aki y a bay di acuerdo pa cu esaki. “Esaki ta corecto. Diabierna merdia nos a compronde di un decision di Conseho di Minister y como tal un peticion pa A.T.A.” e CEO a sigui bisa. “ A.T.A. lo aporta cu algo. Esaki no lo ta 100 mil. Awor lo determina kico esaki lo ta” e CEO a sigui bisa. Y tambe e CEO a mustra cu no ta keda na ATA pa determina con lo usa e placa aki. “ Departamento di Cultura y dicho Ministerio ta fiha prioridad di con lo usa e presupuesto” e CEO a sigui bisa. Algo cu e mandatario encarga cu Cultura tambe a confirma. 

PAKICO ATA

Segun e CEO, Carnaval semper a wordo usa como un vehiculo di promocion, no necesariamente pa atrae turista, pero pa proposito di "PR".” Sinembargo, nos ta den momentonan inusual, unda cu e chens pa captura bishitante tambe den tempo corto ta mas presente” Croes a sigui bisa. Y como tal, meotibonan ta obvio; (a) Omicron a stroba biahe di hopi y pues hopi atrobe ta mas cansa cu normal di e pandemia y (b) e clima / frieu na diferente pais ta yuda duna un extra push.