Rector di Colegio Arubano a sera conoci cu minister di Enseñansa

ORANJESTAD - Recientemente Minister Hooyboer-Winklaar a ricibi e rector nobo di Colegio Arubano, sr. Hans Timmermans, pa un bishita di introduccion. Sr. Timmermans a wordo acompaña pa sr. Jossy Lacle kende ta e presidente di e directiva di SMOA, cu ta e directiva di scol cu ta maneha Colegio Arubano. Minister Hooyboer-Winklaar tabata contento di por a ricibi e rector nobo di Colegio Arubano pa asina conoce otro y intercambia di pensamento riba diferente topico riba nivel di enseñansa. Sr. Timmermans ta originalmente di Hulanda y tabata na Aruba pa un bishita cortico prome cu e bin establece su mes na nos isla pa cuminsa cu su reto nobo na luna di mei proximo.

SOLICITUD

Na september ultimo SMOA a informa Minister Hooyboer-Winklaar di e procedura di solicitud pa un rector nobo pa Colegio Arubano. Sr. Timmermans a wordo selecta despues di un proceso largo y intensivo como e miho candidato for di 31 candidato cu a aplica pa e posicion di rector. Sr Timmermans ta actualmente rector di Alfrink College na Zoetermeer y tin amplio experencia den enseñansa. Despues di a ricibi e peticion formal pa subsidio for di SMOA na december 2014 Minister Hooyboer-Winklaar a duna su aprobacion teniendo na cuenta e reglamentonan existente.