Microbiologo Hulandes na Aruba lo a gana miyones ‘manipulando’ cu benta y compra di testnan di Covid19

PUNTA BRABO – Pa mas di un aña tabatin duda den e maneho di testmento na laboratorio di hospital pa loke ta Covid19. Fuentenan fededigno a confirma na noticiacla cu diabierna mainta e persona responsabel pa e testmento esta e microbiologo clinico Andert Rosingh a termina su contracto cu e hospital y e laboratorio manera cu e portal aki a raporta anteriormente caba diabierna merdia. Fuentenan cerca di e caso, ta papia di un investigacion andando den un posibel fraude of iregularidad cu e compra y maneho di e pruebanan, cu lo a genera miyones di florin pa e persona aki y su compania for di momento cu e pandemia a inicia 2 aña pasa. Mester subraya cu e iregularidadnan cu ta investigando, ta riba manipulacion di benta y compra di e testnan, pero no kier men cu a manipula tambe cu resultadonan di e testnan aki. E hecho cu dos persona lo a manipula cu testnan tambe, ta un otro asunto separa.

BASTA TEMPO

Noticiacla a compronde cu masha tempo caba hospital di Aruba tabatin wowo riba e persona aki, y cu personanan conoci cu e situacion, a te hasta considera e persona aki como un  ‘ladron’ di e forma con e lo tabata opera. E persona aki lo tabata e.o. manipula e cifranan y tabata sea bende of cumpra testnan pa un cierto suma, y bende nan pa otro prijs y lo tabata haci mas cosnan cu no tabata corecto. E investigacionan mester determina kico tur a sosode mas detayadamente. 

KICO TA PASA AWO

E fuentenan a confia na e portal aki diabierna, cu e compania en cuestion lo ta encarga ainda te cu diadomingo cu administracion y maneho di e testmento di Covid19 na e laboratorio y sucursalnan afo cu ta di e laboratorio. Mientras cu no tin detayes ainda di e siguiente paso, a compronde cu mirando cu ta pa basta tempo hospital tabatin bista riba e caso, a traha riba un asina yama ‘back up plan’, pa ora momento yega, pa actua. Pero kico e backup plan ta, no ta conoci. Si a confirma cu personanan cu tin cu test pa Covid19 entrante dialuna, lo no tin problema pa haci esaki na laboratorio di hospital, y su succursal.