Sindicatonan den Corte: A planea accion riba principio ‘No Pay, No Work!’

ORANJESTAD - Sindicatonan SIMAR y SEPPA den corte diabierna mainta a mustra cu no por papia di accion escolar, sino un acto usando e principio di “No Pay, No Work”. Ademas, usando varios documento como prueba, kier a mustra cu e situacion financiero di Aruba a recupera di tal forma cu no ta rekeri mas pa impone e recorte salarial manera cu e ta vigente aworaki. Algo cu sinembargo gobierno no ta compronde y ta sigui mantene e recorte sin mas. Pa loke ta e hecho cu gobierno a keda sorprendi pa e accionan, esaki no ta corecto segun defensa di e abogadonan, pasobra ta for di 2021 (December) tabata ‘reuni’ riba e tema aki. Ya cu gobierno no kier tuma decision pa caba, sindicatonan a dicidi di pone presion y a anuncia nan accion entrante 1 di februari ultimo. E accionan manera informa, tin efecto minimal riba enseñansa. Y como tal, e sindicatonan ta conclui pues cu mester declara gobierno no admissible y rechasa e demanda di gobierno. Sindicatonan a bay di acuerdo mientrastanto, pa durante e periodo te cu e sentencia dia 2 di maart proximo, lo no tin accion.