Gobierno na Corte: Para sindicatonan SEPPA y SIMAR di tene accion y impone multa si no cumpli

ORANJESTAD – Gobierno di Aruba pa medio di su abogadonan a pidi Corte formalmente awe den e caso sumario cu nan a entama, pa para tur accion anuncia entrante 2 di februari ultimo, of welga y of otro tipo d accion, y impone un multa di 250 mil florin pa cada dia of parti di dia cu e sindicatonan no cumpli cu e sentencia aki. Sindicatonan na nan lugar a pidi Corte pa declara Gobierno di Aruba no admissible debi cu un hues civil e.o. no por trata e caso aki si tin un proceso legal habri riba  e tema di incumplimento di trabou cerca e corte di Ambtenaar. 

GOBIERNO

Gobierno su representantenan den Corte, a mustra cu nan ta reconoce e derecho sindical pa tene accion, ora cu tin un diferencia di opinion entre partidonan, basa riba acuerdonan cera segun CAO. Sinembargo, den e caso aki, e accionnan yama ta illegal. Ademas, no por considera e meta di e accion legal si ainda gobierno ta negoshando cu un di e partidonan (Hulanda:red) pa yega na un acuerdo netamente pa e punto pa cual sindicatonan ta bay den accion. E accion a wordo yama riba termino hopi corto, cu no ta duna esnan envolvi y of afecta, tempo pa atende cu e consecuencia di e accionnan. Y tambe e accion ta uno cu no tin un duracion specifico. Y mirando tur esaki, ta considera necesario pa impedi e derecho (di accion) awor.