Hues ta pensa: Gobierno mester ofrece Hulanda un plan structural a cambio di recorte salarial

ORANJESTAD – Hues diabierna mainta durante e caso sumario entre gobierno y sindicadonan SEPPA y SIMAR a indica cu como parti di e solucion, e lo por  duna gobierno di Aruba entre 2 pa tres luna tempo pa ofrece Hulanda un solucion structural cu mester a cambio elimina e recorte salarial di 12.6%. Esaki cu e pensamento, segun e hues,  cu e medida di recorte salarial ta durando mucho largo y mester cambia esaki pa algo structural. Hopi den sala, a interpreta esaki cu hues a sinta riba stul di gobierno y cu e kier acelera e proceso di resolve un problema 'antiguo', esta di resolve e problema di personal cu pa añanan largo gobierno ta pega cu ne. E hues. mientrastanto a indica cu den su sentencia (sea uno temporal of uno fiho pa 2 di maart proximo), e por ordena gobierno pa haci tal. E magistrado a puntra gobierno su abogadonan (DWJZ) pakico ta tardando asina largo pa gobierno bin cu un areglo structural. Mientras cu ora a tuma e medida na 2020 e tabata uno proporcional, hues ta mustra cu mas e tarda e ta bira dificil y ta birando un medida desproporcional. 

Di banda di sindicatonan a puntra si no tin otro forma cu por remedia e situacion di nan banda, cu no ta traha menos ora of welga manera cu nan kier sin cu e ta perhudica e alumnonan. Sindicatonan en cuestion a mustra cu no y cu ta di acuerdo cu mester reemplasa e medida aki cu algo structural. Hues a mustra cu e por duna un sentencia temporal of un sentencia fiho dia 2 di maart proximo. Noticia aki ta den proceso. Keda pendiente pa mas informacion.