Colegio Arubano evaluando pa uza ingles como idioma di instruccion

ORANJESTAD – Durante e bishita recien di e rector nobo di Colegio Arubano Hans Timmermans serca minister di enseñansa, a toca e topico di suma interes pa ambos e mandatario y pa SMOA. Ta trata di e desaroyo di un trayecto bilingual pa HAVO/VWO, cu e opcion di Ingles como idioma di instruccion. Sr. Timmermans ta bin di un school bilingual y ta mira e importancia pa Colegio Arubano evalua e concepto aki pa por posiblemente implementa esaki den futuro.

ST MAARTEN

Minister Hooyboer-Winklaar a mira e concepto di idioma bilingual den practica durante un bishita di trabou na St. Maarten y a keda hopi impresiona. Na Hulanda y na demas pais den reino awo tin varios scol cu ta afilia na e Dutch Network of Bilingual Schools y ta forma parti di e proyecto Tweetalig Onderwijs (TTO) cu ta ser sosteni door di Europees Platform. E proyecto ta stimula enseñansa bilingual y e componente internacional den e curiculo door di brinda entre otro cuidadania mundial y door di stimula intercambio.

IB-PROGRAM

Sr. Timmermans a comenta cu e scol cu e ta encabesa actualmente tambe ta ofrece e IB-program den e prome añanan di VWO. Esaki ta un programa internacional y prestigioso di The International Baccalaureate Organization. E IB-program ta un curiculo international cu ta ser ofrece actualmente na 3800 school na 147 pais na mundo. E programa ta conduci na diferente certificacion y diploma cu ta ser reconoci pa tur Universidad internacional. Minister Hooyboer-Winklaar ta convenci cu esaki ta e direccion cu Aruba mester bay pa por diversifica nos enseñansa y brinda mas opcion na nos hobennan y ta contento cu SMOA y e rector nobo ta comparti e mesun vision aki.