Oomen: E decision di Ministerio Publico pa no comparti cierto informacion ta preocupante

ORANJESTAD – E hecho cu Ministerio Publico no kier duna abogadonan e dossier cu sospechoso Benny Sevinger a entrega na e ‘opsporingsteam’, sin mas comentario, ta preocupa abogado mr Ruud Oomen. Asina e abogado a bisa diaranson mainta durante tratamento di e caso Avestruz pro forma. Huez tambe a nenga di obliga OM pa entrega e documentonan ey. E acto aki ta preocupa e abogado, bisando cu loke cu OM kier bisa cu esey, ta cu e ta inclui solamente documentonan na e dossier cu ta relevante pa nan. “E midi (di kico por y no por) sinembargo segun mi pensamento, ta conclui caba dena articulo 6 di EVRM esta e derecho riba un huicio husto. Esey kier men cu tambe e documentonan cu no ta relevante mester wordo añadi”. 

MESUN PRACTICA

E documentonan ta esnan cu Sevinger a duna e ekipo di investigacion ora cu e tabata deteni. Nan lo mester a mustra un operacion di maneha tereno igual cu awor, pero tempo di MEP. Cu esaki, supuestamente Sevinger lo kier a mustra cu for di e tempo ey tabata usa e practica di otorga tereno. “Mi no a wak e documentonan cu sr Sevinger a entrega, pero for di loke e la bisa den su di 10 interogacion, mi ta compronde cu ta trata di e mesun tipo di practica bou di un gabinete anterior, cu por cierto un di mi clientenan ta wordo culpa di dje, esta e rebenta di un tereno comercial”. Tambe, e abogado ta sigui bisa, segun OM ta trata di documentonan cu lo tin referencia na e maneho di un gobierno anterior’. “E ekipo di investigacion aparentemente ta hopi interesa  den presenta nos un  imagen cu ta mustra cu loke cu e gobierno durante e periodo di minister Sevinger a haci, a desvia den tur aspecto di e procedimento normal pa emiti tereno”, Oomen a sigui bisa. 

SCUCHA TESTIGO\

A mustra cu pesey tambe a usa varios persona clave di e periodo di prome cu 2009, (manera e interogacion di Shak Shie, ex director di DIP). “Ta mustra cu e documentonan cu sr Sevinger a otorga, por mitiga e imagen ey”. Pesey segun e abogado, defensa mester tin conocemento di esey, en caso kier scucha e testigonan aki un biaha mas. “Ademas e documentonan ey por ta necesario pa e castigo di algun testigo, incluyendo mi clientenan”, sr Oomen a bisa. E ta abogado di por lo menos tres sospechoso, E. Biemans, E. Werleman y N. Nuñez. Ademas e abogado a splica hues cu si dado caso resulta cu cierto practica tabata di tal magnitud, e por pone un luz riba e acusacionan contra e.o. su clientenan. E por ta den todo caso, importante pa e castigo, si v yega na un sentencia. Tur esaki a keda presenta diaranson (awe) mainta den corte. Pero huez a rechasa e peticion di e abogado.