Barco crucero cu Aruba a nenga su entrada, a keda confisca

MIAMI/ORANJESTAD – Autoridad Mercano a confisca dos barco crucero, di cual uno a wordo prohibi pa drenta Aruba recientemente. Ta trata di e barconan Crystal Serenity (cu tabata na caminda pa Aruba) y Crystal Symphony. Tabata na januari cu corte a dicta cu e companianan ak tabatin debe habri y mester a paga of wordo confisca. E capitanan a opta pa no mara na Miami y desvia pa otro destinacion, di cual un di nan tabata Aruba, pa evita cu nan lo a wordo confisca. E suma di debe ta 4.6 miyon dollar na recibo di gasoline.

CRYSTAL SERENITY

Ora cu e capitan di Crystal Serenity a tende di e caso, su doño a mand’e pa Aruba, cu no tabata riba e ruta di e itinerario mundial. E barco tabata 3 dia navegando un crucero di 4 luna cu hopi persona di edad, cu a paga miles di dollar pa e crucero largo. A anuncia publicamente cu e barco lo a bay mara na Aruba entrante 30 di januari ultimo, pa un periodo largo te dia 30 di April. Esaki sin cu autoridad di Aruba a confirma nan entrada.

ARUBA SU REACCION

Noticiacla a tuma contacto cu director di Aruba Ports Authority na januari caba pa un reaccion. Aki director di APA Marc Figaroa a nenga cu tin un acuerdo pa e barco mara na Aruba y cu nan tabata ‘den combersacion’. Loke e por a confirma si ta cu e barco, contrario na declaracion di e barco mes, lo a keda Aruba pa un duracion largo. Ora cu e fecha a yega, Aruba a informa e barco oficialmente cu a dicidi cu no ta permiti e barco pa drenta Aruba segun e fecha stipula di 29 di januari ultimo. 

REACCION BARCO

E reaccion di e barco tabata uno di sorpresa, unda cu a anuncia publicamente y na e pasaheronan abordo, cu ‘Aruba a nenga nan entrada’, siendo cu a ofrece pa paga tur gasto delanta. E biaha aki tabata minister di turismo Dangui Oduber cu a reacciona. “Nos lo contesta esaki, paso e barco crusero no ta papia berdad. Si nan a paga adelanta manera palabra nan lo por a drenta sin problema” e mandatario a bisa e portal aki. APA a confirma solamente cu enberdad e no a permiti e barco pa drenta Aruba mas, pero no a bisa e motibo oficial. E barco a opta e ora pa bay Bimini, un isla cerca di Bahamas, unda cu eynan toch a confisca e barco pa e suma menciona. A manda e pasaheronan Miami, unda cu nan a cuminsa conta storianan di horror (lesa otro articulo) cu nan a experencia, incluyendo mencion di Aruba.