AHATA: RevPAR di Januari 2022 ta 45% menos cu na 2019

ORANJESTAD – E RevPAR (e entrada averahe pa tur camber disponibel:red ) di Januari 2022 ta 45% menos cu na 2019. Asina Aruba Hotel & Tourism Association (AHATA) ta raporta. Nan ta acumula e cifranan di ocupacion y prijs di hotelnan mensualmente, y segun CEO Tisa LaSorte, e ultimo data ta indica cu e ola recien di COVID a causa mas cancelacion cu a anticipa.

DATA JANUARI 2021:

-        Ocupacion: E grado di ocupacion tabata 48%; cual ta un recuperacion di solamente 55% compara cu Januari 2019. Anteriormente a proyecta ocupacion di 76% pa Januari 2022, pero e ultimo ola di COVID a causa hopi cancelacion y a perde 37% di reservacion.  

-        ADR: E balor averahe di cada camber bendi, tabata $356.84, cual ta casi mescos cu na 2019. 

-        RevPAR: E entrada averahe pa tur camber disponibel, ta 45% menos cu na 2019, yegando $172.12. RevPAR ta e indicador principal di rendimiento di e sector. 

PROYECCION:

E proyeccion di sector hotelero su ocupacion ta indicacion pa e recuperacion economico di Aruba. AHATA ta proyecta un recuperacion di 84% pa 2022, compara cu 2019. 

TIMESHARE:

Propiedadnan Timeshare tambe a experiencia cancelacion na Januari y e grado di ocupacion realisa tabata 75%. Proyeccion di grado di ocupacion pa Februari 2022 ta 87%.