Rey Willem Alexander a acepta retiro di Opstelten y Teeven

DEN HAAG – Rey Willem Alexander net prome cu mey anochi ayera a acepta e retiro di tanto minister di husticia hulandes Ivo Opstelten, como su secretario di estado Fred Teeven. E la duna nan e salida ‘mas honorable’, y a gradici nan pa nan labornan haci pa e pais. Mientrastanto awe tardi ta sigui un debate den Tweede Kamer riba e asunto aki. E debate ta pidi pa miembronan di oposicion pa asina haya sa mas informacion di e caso pa cual e dos mandatarionan a retira abruptamente.

RETIRO ABRUPTO

Tabata ayera tardi cu tanto minister di husticia hulandes Ivo Opstelten y secretario di estado Fred Teeven a anuncia nan retiro . E motibo ta e asina yama ‘Teeven-deal’. A bira conoci ayera cu toch a manipula cu 4.7 miyon florin den un deal cu un criminal di droga, cu ta mucho mas cu e 2 miyon cu Opstelten a informa na su parlamento anteriormente. Lo a haya un recibo di pago di e suma mas grandi, na e criminal Cees H. Esaki e ministerio di husticia a laga sa despues cu a logra haya e recibo ‘perdi’.

PRUEBA

Cu esaki tambe a keda proba cu e mandatario a informa parlamento incorecto. Opstelten ta responsabel politicamente pa e maneho di Teeven, cu e tempo ey tabata fiscal. Manera palabra ayera nochi e mandatario lo mester a contesta parlamento hulandes ainda riba e asunto, y contesta por lo menos 100 pregunta. Ora cu un minister retira, su secretario di estado normalmente tambe ta retira.

E CASO MES

Na aña 2000 ora cu Teeven tabata un fiscal, e la yega na un acuerdo pa laga e criminal Cees H keda cu tur su placa, y paga gobierno 750.000 mil. Pero belasting no a wordo informa di esaki. Aña pasa e caso a haya atencion atrobe ora cu no por a sali na cla cuanto placa a wordo deposita riba e cuenta di e criminal. E tempo ey Opstelten a bisa cu H a ricibi solamente 1.2 miyon riba su cuenta. Esaki siendo cu e abogado di H a bisa cu ta un suma serca di 5 miyon. Cu e asunto aki, ta indica cu Opstelten a gaña deliberadamente.