Ta acusa e.o. doño di Bucuti Beach Resort di a soborna ex minister pa fabor

ORANJESTAD – Un grupo di persona durante un periodo di 7 aña a logra soborna varios persona di gobierno, incluyendo e ex minister Benny Sevinger. Interesante ta e periodo cu esak a sosode cu ta cuminsa den periodo di gabinete anterior di Mike Eman y caba den e prome termino di gabinete Wever Croes 2019). Aki ta sospecha ex minister Benny Sevinger como F. Abath di soborno pasivo (como amtenaar di DIP). Pa otro sospechoso ta papia di soborno activo. Nan, segun OM, a soborna Sevinger/Abath den varios caso durante 1 februari 2012 pa 19 di October 2019. Den e caso di Deshaun, sospechosonan Arends y Winterdal a soborna Sevinger. Den caso Sussebeek, ta Sussebeek mes a soborna Sevinger . Y den e caso Fundacion Curason Berde, sospechoso Harms hunto cu varios compania (Milero Investment NV, Island Estates NV Zenwave y Pristine Estates NV) a soborna e ex minister. Di nan Pristine Estates a paga un suma miyonario pa sali afo. E otronan no.

BUCUTI BEACH HOTEL

Tin e caso di Bucuti Beach Resort unda cu ta acusa e doño E. Biemans di a soborna e ex minister y Abath (DIP) e tempo ey entre 1 di mei 2012 pa 1 di mei 2019. Den e caso aki, e sospechosonan en cuestion a ofrece e ex minister regalo, promesa of servicio. Entre nan, a haci pagonan na Fundacion Curason Berde, un fiesta den Holiday Inn, y varios trabou di remodelacion na cas di Sevinger, y tambe e construccion di un Gym, y un porta di entrada. Esaki tur a wordo haci door di e sospechosonan na Sevinger y Abath, pa den funcion di minister, laga e minister haci cierto cosnan. Entrenan otorga tereno erfpacht of haci cambio riba e opcionan di e derecho riba tereno erfpacht. En corto, e sospechosonan aki a duna Sevinger regalo of pague, a cambio di algo bek.