Caso Avestruz: Un grupo a manipula gobierno pa haya tereno illegalmente durante 4 aña

ORANJESTAD – Den e caso penal Avestruz, un cantidad di persona, considera como sospechoso den e caso aki, a haci fiesta cu soborno, falsificacion y estafa, tur pa por haya tereno riba lugarnan prominente. Pa tin un bon bista di tur e actonan, Ministerio Publico a reparti e caso Avestruz den varios sub caso, cu cada uno un nomber diferente. Ta trata cada uno di transaccionan di tereno riba varios parti di e isla, den e caso aki terenonan na Wayaca y Eagle Beach. Mayoria di e casonan ta trata e forma con a usa medionan illegal pa adkeri e terenonan aki, a cambio di algo otro. 

CASO DESHAUN 

E caso Deshaun ta trata estafa di pais Aruba entre februari 2013 y 2017, pues henter un termino di gobierno. Segun OM, den un forma falso y hopi astuto, y of actonan engañoso, pais Aruba a entrega bienes y tereno di erfpacht. “Den esaki sospechosonan Sevinger, Abath, Winterdal, Arends y Richardson tabata participle den varios forma.Tabata haci peticionan incorecto cu no tabata cumpli cu condicionan valido y cu cual falsamento a crea e intencion cu e sospechosonan ak lo a bay desaroya un proyecto riba terenonan na Wayaca” e fiscal a sigui bisa. E peticionan aki tabata ,-contra tur regla vigente y mientras cu nan no tabata vumpli cu e rekisito,- aproba y despues confirma pa medio di decreto ministerial. 

CASO ELENATH

Den e caso Elenath tambe tabata trata di estafa den e mesun periodo y mesun practica. Aki sospechosonan Sevinger, Abath, Winterdal, Every, Arends y Richardson tabata envolucra den varios forma. E diferencia tabata cu aki tabata trata terenonan na Eagle Beach.  

CASO DESHAUN/ELENATH

Den e caso aki, sospechoso Arends, a haci su mes culpable na falsificacion di firma door di haci uso di varios documento falsifica manera peticion di permiso cu tabata parse peticionan pa derecho di erfpacht den e dossier Deshaun/Elenath.  

CASO DAMIRA/LIZNER

Den e caso aki, fiscal ta continua bisando, ta trata durante un periodo di dos aña (2014-2106) unda cu door di falsamento y hopi astuto, y of actionan engañoso, pais Aruba (lesa:Gobierno ) a otorga bienes y derecho di erfpacht. Aki sospechosonan Sevinger, Abath, Werleman, Nunez y Mansur tabata envolvi den varios forma, segun e fiscal. Esaki tabata pa otro percelanan na Eagle Beach. Atrobe, tabata entrega peticionan incorecto, cu no tabata cumpli cu e rekisito valido. Sospechoso Sevinger y Abath, contra tur regla, tabata aproba esaki segun e fiscal. 

CASO DAMIRA/LIZNER

Den e parti aki ta trata falsificaccion unda cu sospechosonan Mansur, Nunez, y Werleman, a haci mnan mes culpable door di falsificando varios documento manera peticion pa haya derecho di erfpacht. Keda pendiente pa mas.