Tur abogado den caso Avestruz a pidi mas tempo pa prepara

ORANJESTAD – E hecho cu abogadonan defendiendo nan clientenan den e caso penal Avestruz a haya un dossier di 22 mil pagina algun dia prome cu Pasco aña pasa, ta hacie imposibel pa repasa tur e documento den apenas un luna y sa si mester di mas investigacion of no. Como tal, e abogadonan a pidi  tempo te fin di maart of comienso di April 2022 pa repasa tur cos y pa durante un di 2 regiezitting e ora, determina si nan mester di mas investigacion, testigo of no. Huez ta dicta diaranson mainta si ta concede esaki of no. 

TEMPO

Ora cu huez awe mainta a duna palabra na e prome abogado (Rudy Oomen) pa presenta su puntonan den e regiezitting, e abogado a crea un patronchi cu tur otro abogado despues a sigui. Mester di mas tempo pa prepara. Oomen a pinta un cuadro unda cu ta mustra cu na Aruba dificilmente un bufete di abogado cu ta practica tur tipo di ley (no solamente penal) por tin tempo y personal pa prepara 22 mil pagina y keda cla cu su investigacion. Nos a wordo sorprendi y gebuldozed cu e documentonan, cu ta pone nos den desventaha. OM a haya 3 aña pa prepara esaki den tur trankilidad, mientras cu abogado(nan) ta haya 1 luna so. Esaki ta completamente irazonable. Y cu esaki a daña e defensa caba” tabata palabra di e abogado den su salida. 

POLITICA

Lo interesante ta cu e abogado a pidi tur documento cu sospechoso Benny Sevinger a entrega na OM cu ta mustra cu ta for di tempo di gobierno di partido MEP, practica di bende tereno manera cu nan ta wordo acusa di dje, tabata wordo haci caba y pa cual su cliente lo tabata envolvi tambe. A haci mencion di un asina yama ‘gedogen beleid’, esta maneho tolerante. A pidi pa scucha algun persona di DIP, pa scucha cierto proceso di benta di tereno. El a haci mencion tambe cu sr Rocco Tjon cu a entrega keho contra e ex minister, awe ta minister di husticia, y cu ta duna e asunto aki un dimension politico. A mustra cu practicamente tur e acusadonan ta wordo mira como sostenedornan di e contra partido AVP. Y kier tin tur e documentacion ey pa mira e maneho di persecucion di OM y evalua esaki.  OM RABIA

Riba esaki e fiscal en cuestion a rabia y mustra cu e ta protesta e insinuacion di metemento politico y cu OM ta un instituto completamente independiente. Pues no por haci como si fuera tin politica hinca den e caso aki y cu ta kere cu door di trece otro puntonan di otro gobierno, cu esey ta sirbi. E maneho di e gabinete MEP di e tempo ey no ta na discussion aworaki segun e fiscal.

KOCKAbogado di e sospechoso principal Benny Sevinger, esta David Kock, a usa e nomber di e caso, Avestruz pa ilustra na huez cu e Avestruz ta e pahra cu ta esun cu ta ‘mas lihe’, pero esey no kier men cu mester trata e caso aki cu e mesun lihereza aki manera e ta sosodiendo, uniendo su mes na e peticion di colega abogado Oomen, pidiendo mas tempo. 

IREGULARIDADNAN

Segun Kock, a mustra cu loke ta wordo mira awor como hechonan castigabel, no ta necesariamente castigabel. Esaki pasobra e forma di haci cu tereno. Tambe a pidi copia di tur documento relaciona cu opcion pa tereno, benta di tereno etc, pa por mustra cu no ta scohe hendenan ‘selectivo’. “Ta peligroso ora cu bo cuminsa selecta hende’. E kier tur documento, pa asina e tin un ‘bista completo’ di con e proceso di tereno a bay realmente. E la mustra tambe cu e kier scucha algun persona como testigo, y a menciona algun. 

OTRO ABOGADONAN

Otro abogadonan no a bay den detayes di nan caso, pero a sin mas pidi tambe mas tempo pa por prepara nan mes. Diaranson mainta 10’or huez ta continua cu e regiezitting y lo sea aproba of desaproba e peticion di mayoria abogado pa cu e caso y tambe mas sigur stipula un fecha pa un di dos regiezitting. Ta mustra cu no ta cla ainda pa stipula un fecha pa e caso mes.