Na Corsou a horta ekipo di reskate di bombero na post di Barber

WILLEMSTAD - Polisnan ta hasiendo investigashon relashoná ku un robo ku a tuma lugá riba un vehíkulo di brantwer na e pòst na Barber. Durante e robo, malechornan a bai ku ekipo di reskate sofistiká ku alabes por keda usá pa kometé kualke kiebro grandi.

Ayera mardugá, malechornan lo mester a bai ku ekipo di reskate hidróuliko for di un di e vehíkulonan di brantwer ku ta stashoná na e pòst  na Barber. E ekipo aki ta sumamente importante i nesesario pa brantwer por hasi su trabou di reskatá personanan ku ta enbolbí den situashonnan kompliká i di peliger manera e.o un aksidente di outo kaminda tin persona pegá den e vehíkulo.

Un yamada ta bai na kualke persona ku sa algu di e ladronisia aki, pa tuma kontakto ku polis mesora na 917 òf e liña anónimo 108.

Ademas polis ke hasi un yamada na doñonan di negoshinan pa ta alerta, pasobra e ekipo aki ku wòrdu hòrtá, hopi bia ta wòrdu usá pa kometé kiebronan na lokalidatnan unda tin propiedat di hopi balor p.e kaha fuerte, bankomátiko i kaminda tin porta di heru ku mester keda kibrá.

TOD i reshèrshinan a bai na e sitio i ya ta hasiendo e investigashonnan nesesario.NOTA: Texto ta scirbi na Papiamento fonetico di Corsou.