Sindicatonan a opta pa warda caso sumario envez di reuni cu gobierno awe

ORANJESTAD – Sindicatonan bringando pa kita e recorte salarial di 12.6% a opta finalmente diabierna merdia pa no reuni cu gobierno di Aruba. Gobierno mainta a invita e sindicatonan pa sinta na mesa awe diabierna 3’or pa atende e contesta di Conseho di Minister di Reino (RMR) y yega na un tipo di areglo. Sindicatonan a bisa cu nan lo a atende e reunion aki. Sinembargo pa merdia (manera cu e portal aki a raporta caba), e sindicatonan a haya e ‘citacion’ di Corte pa e caso sumario pa otro siman diabierna 9’or di mainta, pa trata e caso. Esey a pone cu a dicidi pa no presenta na e reunion awe mas, pero warda e resultado di e caso di otro siman y prepara pa esaki.