Ministerio Publico a cera transaccion di 1 miyon florin cu compania di Real Estate den e caso Avestruz

ORANJESTAD - Ministerio Publico a recientemente cera e caso Avestruz\ contra e naamoze vennootschap Pristine Estates NV, sospechoso den e investigacion penal, pa medio di un transaccion di 1 miyon AFL. Asina Ministerio Publico a bisa den un comunicado diabierna. Investigacion di e portal aki ta mustra cu ta trata di un compania di Real Estate situa na Noord, y cu tin dos director, di cual un dama local. 

Pristine Estates NV tabata wordo sospecha di soborno activo. Ministerio Publico ta di opinion cu tin suficiente prueba contra Pristine Estates NV y cu e hecho pa cual Ministerio Publico a cita Pristine Estates NV por wordo comproba.

Considerando tur hecho y circunstancia, bao di cual e specificacion cu no tin partinan perhudica cu interesnan cu na cualkier forma lo por wordo daña na momento di un transaccion, Ministerio Publico ta mira e transaccion menciona como e afdoening mas apropia pa Pristine Estates NV. Ora di yega na e transaccion a alavez laga conta cu e sospechoso Pristine Estates NV ta un entidad legal. Contra un entidad legal hues penal por impone solamente sancion financiero. E boet maximo cu un hues penal por impone pa e hecho aki ta Afl 100.000 si e bay corte. 

Ministerio Publico ta di opinion cu e suma total di e transaccion ta husto pa cu e hechonan y pa cu e rol specifico cu e NV tabatin den Avestruz. Tanto Ministerio Publico como Pristine Estates NV ta considera e transaccion aki un afdoening apropia di e caso penal, mirando tur e hechonan y circunstancianan. 

Segun Ministerio Publico, cu Pristine Estates NV a cera e transaccion aki no kier meen cu Pristine Estates NV ta admiti culpabilidad penal y tampoco cu e ta admiti di lo a ricibi algun benificio ilegalmente. 

Ministerio Publico ta enfatiza cu e transaccion no tin influencia riba e procedura penal contra e otro sospechosonan den e caso.