Analysis: Aruba lo protesta e decision di RMR pa no para recorte salarial, manera cu minpres a bisa e siman aki?

“Si Hulanda bisa cu si por stop e recorte, e orey ta cla. Pero si Hulanda bisa cu no, lo protesta e decision aki”. Tabata palabranan di e propio prome minister Evelyn Wever Croes e siman aki riba e tema di recorte salarial durante un declaracion na prensa local. Mientrastanto awe mainta Hulanda (RMR) a dicidi cu no ta para e recorte salarial pasobra no ta prudente pa haci esaki mientras cu Aruba ta ricibiendo sosten di likides. E pregunta ta awor si gobierno di Aruba enberdad lo para riba su ponencia cu ta ‘protesta’ e decision aki, manera cu nan a declara e siman aki. Tabata prome minister Wever mes cu a pidi sindicatonan pa no tuma accion e siman aki y warda diabierna ‘pa wak kico RMR ta bisa”. E mandatario no a gusta cu e sindicato a opta toch pa bay den accion, aunke e la respeta esaki. Di otro banda a pidi hues pa por lo menos 2 sindicato haya un ‘orde maatregel’ contra e accionan. Ambos sindicato (SEPPA y SIMAR) a respeta e decision ey y a para tur accion pendiente awe diabierna. 

KICO GOBIERNO A PIDI

Prome Minister Wever - Croes e siman aki tambe a splica cu Aruba a pidi Hulanda pa e aña aki 2022, stop e cortamento di 12.6% y asina tur hende bay bek na salario di 100%. E peticion ey tabata awe diabierna riba agenda. Gobierno na su turno a bisa cu na ta warda wak kico ta pasa awe diabierna den Rijksministerraad pa wak kico lo bira e siguiente paso. “Si Hulanda bisa cu si por stop e recorte, e orey ta cla. Pero si Hulanda bisa cu no, lo protesta e decision aki” e mandatario a bisa na tal occasion. Wever a bisa tambe sinembargo cu e otro opcion tabata, cu Hulanda por a bisa algo ‘in between’, y den e caso aki lo a sigui insisti pa haya un contesta concreto di Hulanda.  Di otro banda, a bisa cu si Hulanda bisa cu no por awo, ta compronde pasobra pa e proximo 6 lunanan sigur ainda Aruba ta depende di sosten financiero di Hulanda (segun proyeccionnan). Palabra ta keda na prome minister awor. Skirbi pa Tito Laclé.