Arends: Stepnan electrico no tin permiso pa opera na Aruba pero ta ‘corigiendo’ e situacion

ORANJESTAD – E stepnan popular electrico cu por mira turistanan mas parti coriendo ariba na Aruba, no tin e permiso necesario. Minister di transporte Ursell Arends a confirma esaki diahuebs pa noticiacla. E mandatario a mustra mas aleu cu ora a bay averigua, cu enberdad, nan no tin un permiso di Departamento di Transporte Publico. (DTP). “ Pero DTP ta trahando pa asina correct esaki”, e mandataro a sigui bisa. Locual cu ta observa ta cu cambio den ley ta necesario. Esaki mirando cu pa motibo cu nos ley nan ta data di basta aña caba, e no ta acapara cambionan di vehiculonan of medionan di transporte ‘nobo’ cu a subi mercado, pero cu no tin permiso pa nan of cu no ta reconoci segun nos leynan actual di transporte publico.. Sin un ley e ta dificil pa crea un maneho. Tur esaki tin atencion di DTP y e ministerio pa asina por regla esaki pa medio di ley.

Mes momento e mandatario a sigura e portal aki cu ta trahando riba maneho general di transporte publico en especial pa locual ta trata e permisonan pa taxi, T y O  pa yega na maneho responsabel, transparente y husto. Dia 18 Feb nos ta firma un MOU cu Universidad di Aruba pa hasi un carrying capacity study pa loke ta transporte publico ” e mandatario a sigui bisa. Esaki lo mester yuda delinea e maneho di gobierno. Potret cortesia https://www.esteprijden.nl.