Gobierno ta anuncia mas flexibilisacion di medida contra Covid19 awe nochi

ORANJESTAD – Awe nochi gobierno ta anuncia cambio di medida pa loke ta Covid19. Kico exactamente esaki ta encera, no ta conoci. Pero for di prome minister Wever, noticiacla a compronde awe mainta cu ta trata mas bien di flexibilisacion di mas medida. "E cifranan ta indica cu nos por sigui cu e plan di flexibilisa (medidanan)". E portal a compronde tambe for di prome minister Wever, cu ta awe merdia ta reuni riba e tema unda cu lo tin cu dicidi kico ta haci cu e medidanan, esta si ta kita medida of no. Mes momento e mandatario a mustra e portal aki cu por sigui cu e plan di flexibilisacion di medida. " Cual medidanan precies lo wordo anuncia, y  si esaki ta bin compania cu otro medidanan, tambe lo wordo informa awe nochi" e mandatario a sigui bisa. 

E SITUACION ACTUAL

Hecho ta cu lo haci anuncionan riba e tema aki. Mirando e situacion actual, unda cu te cu ayera, Aruba tin 259 caso activo, 193 morto, y 32 hende hospitalisa, ta mustra cu e situacion no ta unda cu nos kier ta, pero sigur ta bahando, compara cu e loke nos tabatin comienso di aña cu e yegada di e ola # 5. Cu esaki nos a yega un peak e prome siman di aña cu riba 1100 caso riba un solo dia raporta y cu mas di 5 mil caso activo.